Ka përfunduar pak më parë takimi mes kreut të kreut të PD, Lulzim Basha dhe kryetarëve të degëve që u mbajt në selinë blu. Ndërkohë janë bërë të ditura edhe detaje nga ky takim ku është folur për zgjedhjet e 25 prillit dhe për rezultatin që PD mori prej tyre duke fituar vetëm 59 mandate, kundrejt 74 që mori PS.
Mësohet se Basha është deklaruar për mosnjohjen e zgjedhjeve pasi sipas tij ato nuk kanë qenë të lira dhe të ndershme. Ndër të tjera është bërë me dije se Basha do të fillojë javën e ardhshme një tur në çdo degë të PD-së me qëllimin për të mbledhur prova për manipulimin e zgjedhjeve, Ai gjithashtu iu ka deleguar si porosi krerëve të PD-së në rrethe që të mbledhin prova që zgjedhjet janë vjedhur.
“PD nuk mund të njohë një proces zgjedhor si ai i 25 prillit. Mos bini në kurthin e kundërshtarit. Mblidhni faktet e manipulimeve. Ne jemi duke grumbulluar fakte në rrugë ligjore për të mos njohur procesin e 25 prillit. Javën e ardhshme do të nis tur në çdo degë të PD-së”, mësohet të ketë thënë Basha në mbledhjen e sotme me kryetarët e degëve të PD.
Nga ana e demokratëve ka pasur edhe më herët deklarata për mosnjohjen e zgjedhjeve. Mes tyre kanë qenë Ervin Salianji, Edi Paloka etj që kanë deklaruar se zgjedhjet nuk do të njihen pasi sipas tyre nuk kanë qenë të lira dhe të ndershme.
