Rai 3 ka zgjedhur ta rikujtojë zbarkimin e anijes “Vlora” 30 vite më parë në Bari, në një dokumentar për lidhjet mes Italisë dhe Shqipërisë. Ndër personat që televizioni italian ka intervistuar është edhe drejtori sportiv i Lazios, Igli Tare.
Ish-futbollisti shqiptar ka kujtuar fëmijërinë në Vlorë e ka treguar për ëndrrën e tij për të luajtur në kampionatin Italian. Një ëndërr kjo e bërë realitet më vonë.
“Jam lindur e rritur në Vlorë, kam kujtime shumë të bukura. Aty lindi ëndrra ime për të luajtur në kampionatin italian. Kam arritur ta realizoj me shumë kënaqësi”, tha Tare.
Tare arriti të largohej nga futbolli shqiptar drejt Gjermanisë, pasi në vitin 1994 mori nënshtetësinë greke, për të cilën tha se fillimisht nuk e donte.
“Në fillim nuk do të kisha dashur ta merrja, por në rini, forca për të provuar diçka të re, përfaqësonte një aventurë për të gjithë popullin tonë”, ish-sulmuesi kuqezi.
Për zbarkimin e anijes “Vlora” 3 dekada më parë, Tare tha se ishte ëndrra e 20 mijë personave që kërkonin në Itali diçka më të mirë. Tare tha se kjo është diçka që na lidh më shumë me popullin italian. Ai u shpreh se Italua është vendi më i dashur, ndërsa vuri në dukje sheshet me mbushura plot në Shqipëri, kur shqiptarët shikonin “Të kaltrit” në ndeshjet e Europianit.
“Jam i lumtur për atë që kam ëndërruar që fëmijë. Është një kënaqësi e madhe. Zbarkimi i anijes “Vlora”? Ëndrra e 20 mijë personave që të kërkonin në Itali diçka më të mirë. Kjo është diçka që na lidh më shumë me popullin italian.
Është vendi më i dashur, sheshet shqiptare gjatë Evropianit ishin të mbushur me njerëz që bënin tifo për Italinë. Jemi rritur bashkë me televizionin dhe gjuhën italiane. Ka qenë gjithmonë një ëndërr ta jetoja personalisht”, ka thënë Tare në intervistën për Rai 3.
