Zbardhen detaje të reja nga vrasja e 14-vjeçarit Martin Cani.
Hetimet për vrasjen tragjike të Martin Canit më 18 nëntor kanë zbuluar se çanta e autorit të dyshuar është gjetur në çatinë e një godine pranë rrugës “Fadil Rada”, ku brenda saj ndodheshin thika e krimit dhe librat shkollorë, por jo celulari i tij.
Dyshohet se autori, pas sherrit që ndodhi rreth 200 metra larg shkollës “Fan Noli”, ka hedhur çantën në çati teksa largohej me vrap.
Çanta u gjet rastësisht nga banorët e zonës, të cilët njoftuan policinë pas konstatimit të thikës.
Kujtojmë se sherri me thika mes adoleshentëve ndodhi menjëherë pas daljes nga shkolla dhe rezultoi fatal për Canin, i cili u godit në zemër.
Ndërsa ditën e sotme prindërit kanë deklaruar para shkollës Fan Noli që do të bojkotojnë mësimin, si dhe ditën e hënë në orën 17:00 do të zhvillojnë protestë para Ministrisë së Arsimit, ku kërkojnë dorëheqjen e Manastirliut. Ndërkohë autorit të mitur i është caktuar masa e sigurisë “arrest në burg”.
