Gjykata e Korçës ka vendosur masën e sigurisë “arrest me burg” për Kejsi Spahillarin, me kërkesë të Prokurorisë, në lidhje me vrasjen e të dashurit të saj, Antonio Karafili, një ngjarje e ndodhur shtatë vite më parë në Voskopojë.
Fillimisht, ngjarja ishte regjistruar si vetëvrasje, pasi trupi i 18-vjeçarit Karafili u gjet i varur me çarçaf në një pemë në periferi të fshatit.
Identifikimi i Spaillarit u bë përmes një gjurme biologjike të ADN-së së saj, e gjetur në çarçafin me të cilin ishte lidhur viktima. Po ashtu, e njëjta provë përfshiu në ngjarje edhe Rexhep Vathin, i cili ka ndërruar jetë më pas si pasojë e një vetëvrasjeje.
Prokuroria ka lëshuar urdhër-arrest për Kejsi Spaillarin, e cila sipas informacioneve të fundit ndodhet në Kanada. Ajo akuzohet për “vrasje me dashje” kryer në bashkëpunim.
Sipas dosjes hetimore, motivi i krimit lidhet me një marrëdhënie paralele, viktima kishte qenë në një lidhje me Kejsi Spaillarin, e cila ndërkohë ishte në lidhje edhe me Rexhep Vathin.
Mbrëmjen e ngjarjes, Antonio dhe Kejsi janë parë bashkë në lokalin e familjes së tij në Voskopojë, ku kanë debatuar për arsye xhelozie. Më pas, Spaillari është larguar dhe Antonio është gjetur i pajetë pak orë më vonë.
Fillimisht, rasti u trajtua si vetëvrasje dhe çështja u klasifikua si “shkaktim i vetëvrasjes”. Por pas kërkesës së gjyqtarit Arben Lena për rihapjen e hetimeve, dosja mori drejtim të ri dhe çoi në rikualifikimin e ngjarjes si “vrasje me dashje”.
