Një sasi prej 283 kg kokainë është motivi i rrëmbimit dhe vrasjes së Jak Prengës.
Vëllai i tij, i cili ndodhet në burg në Angli, nuk arriti që ta çonte drogën në destinacion, duke bërë që pritësit të merrnin peng vëllain e tij për t’i bërë presion.
Kur familjarët morën vesh lajmin, vëllai i Jakut i telefononte shpesh për t’i qetësuar.
Ai u ka kërkuar që të mos flasin me policinë, pasi e ka kryer detyrën dhe një pjesë e drogës ka shkuar në destinacion.
Policia nëpërmjet përgjuesve të vendosur në shtëpinë e Prengës, ka arritur të zbardhë telefonatat e vëllait të viktimës me familjarët.
Ky i fundit u thoshte që të qëndronin larg vëmendjes së policisë, ndërsa u kishte treguar se të vëllanë e mbanin peng në Shijak.
Mirëpo gjatë transportit për në Shijak, Jak Prenga ndërroi jetë për shkak të goditjeve dhe gjakderdhjes.
Plani i autorëve ishte që ta mbanin brenda kompleksit “Golden” në Shijak, por nga pamjet e siguruara nga kamerat e vendosura në zonë, u pa se rrëmbyesit nxorrën kufomën e 49-vjeçarit nga makina.
Nga hetimet e deritanishme, rezulton se droga me vlerë 12.7 milion paund, duhet t’iudorëzohej 3 grupeve kriminale, në Shijak, Vlorë dhe Shkodër.
Në lidhje me ngjarjen, policia ka arrestuar kushërinjtë, Leonard dhe Elton Hajri, babanë e Altin Hajrit, Bajram Hajri, si dhe dy persona të tjerë.
Ndërkohë në kërkim janë edhe 5 persona të tjerë, midis të cilëve edhe Altin Hajri, njëri nga pronarët e kompleksit “Golden”.
