Ditën e sotme, nën drejtimin e Presidentit të Republikës, Ilir Meta, u zhvillua mbledhja e Këshillit të Sigurisë Kombëtare me anë të një video-konference, nisur nga kushtet ku ndodhet vendi ynë pas goditjes nga COVID-19.
Përveç Metës, Ramës dhe Bashës, në mbledhje morën pjesë edhe kryetari i Kuvendit, Gramoz Ruçi, ministrja e Shëndetësisë Ogerta Manastirliu, ministrja e Drejtësisë Etilda Gjonaj, ministri i Brendshëm Sandër Lleshaj, minitrja e Financave Anila Denaj, ministrja e Infrastrukturës Belinda Balluku, koordinatori ekonomik Arben Ahmetaj.
Çështjet e diskutuara ishin:
- Masat që janë marrë dhe po merren nga qeveria për përballimin e situatës në vend dhe parandalimin e përhapjes së mëtejshme të pasojave të COVID-19;
- Përballimin e situatës ekonomike, nga efekti i sjellë nga përhapja e COVID-19;
- Masat e marra për rikthimin e shtetasve shqiptare, të cilët kjo situatë i ka gjetur jashtë territorit të Republikës së Shqipërisë.
Në një njoftim për shtyp, Presidenca ka bërë me dije se kryeministri Rama dhe anëtarët e qeverisë informuan për masat e marra dhe për skenarët që do të duhet të përballohen në varësi të zhvillimit të situatës, teksa kryetari i Kuvendit ka shprehur gatishmërinë për përmbushjen e detyrimeve të Kuvendit në këtë situatë.
Nga ana tjetër, kryetari i Partisë Demokratike Lulzim Basha shprehu pikëpamjet dhe sugjerimet e opozitës për të përballuar këtë pandemi dhe pasojat ekonomike e sociale.
Kurse, presidenti Meta ka shprehur besimin se në këtë frymë uniteti, vendi do ta përballojë me sukses këtë situatë të vështirë, jo vetëm për Shqipërinë, por për mbarë botën, në interesin me të mirë të çdo qytetari të Republikës së Shqipërisë.
Sipas njoftimit, Mbledhja e Këshillit të Sigurisë Kombëtare u zhvillua në një frymë tepër konstruktive dhe bashkëpunuese dhe pati si qëllim kryesor unifikimin e të gjitha energjive dhe kapaciteteve njerëzore, mjekësore e shkencore për të përballuar me efikasitet të plotë këtë situatë të vështirë në funksion të mbrojtjes së shëndetit të çdo qytetari, ekonomisë kombëtare, paqes sociale dhe sigurisë.
Vendi ynë u godit nga Coronavirusi më 9 mars dhe deri tani janë shënuar 5 viktima dhe janë infektuar 146 persona.
