Janë zbuluar detaje të reja pas arrestimeve tek AKBN. I gjithë hetimi ka nisur prej kallëzimit të drejtorit të Albpetrol, për disa puse nafte.
Puset i kishte një shoqëri aksionere, e quajtur ‘Phoenix Petroleum’, që ka për drejtues Naim Kasën dhe biznesmenin Isuf Berberi. Ajo ka shfrytëzuar disa puse nafte, dhe ecurinë e këtyre puseve duhej ta ndiqte Agjencia Kombëtare e Burimeve Natyrore. Shoqëria nuk ka kryer investimet e detyrueshme tek puset e naftës që kishte, dhe në AKBN kishte paraqitur 8 fatura të falsifikuara, për shërbime që nuk i kishte përfituar nga kompania amerikane Black Swan Energy Service.
Zyrtarët e AKBN, Qani Hoxhaj, Rezarta Qose Sulejmani, Denis Durrësi, dhe Klodian Gradeci kanë certifikuar kundër ligjit punimet e pakryera dhe i kanë pasqyruar në fatura si punime të kryera. Vlera totale e falsitetit të faturave është 1 milionë e 229 mijë dollarë.
Po ashtu dy punonjësit e Tatimeve, Arben Doda dhe Simon Marku përpiluan një raport kontrolli kundra ligjit, dhe administrata pësoi një dëm prej 568 mijë dolllarë amerikanë duke mos denoncuar rastin.
AKBN nga gjithë këto veprime të jashtëligjshme në përfundim ka pësuar një dëm prej 1 milionë e 472 mijë e 766 dollarë.
Në këto hetime përveç Prokurorisë shqiptare është e përfshirë edhe FBI, e cila u angazhua pas kërkesës së letërporosisë për të konfirmuar se nuk kishte partneritet mes kompanisë shqiptare dhe asaj amerikane.
Shpërdorimet e detyrës
Skema si kjo nuk janë të vetmet në Shqipëri. Pikërisht, falsifikimet e kompanive private që marrin në përdorim asetet publike të natyrës sonë, në bashkëpunim me zyrtarë shtetërorë, bëjnë të tilla dëme kolosale për buxhetin e shtetit.
E njëjtë është situata si me naftëtarët e Ballshit, që vuajnë mbylljen e rafinerisë dhe pagat e prapambetura, sepse kompani fantazmë apo të lidhura me kupolën drejtuese të shtetit, vijnë dhe marrin shërbime, por nuk japin asgjë mbrapsht në investime, apo më minimalja, pagat e punëtorëve.
/GazetaReforma.com/
