Janë zbardhur detaje të reja në lidhje me ngjarjen që vuri në alarm Vlorën pasditen e sotme. Mësohet se personi, i cili i shpëtoi një atentati me tritol në Vlorë, është motra e Armando Sulejmanit.
Burime nga grupi hetimor, bëjnë me dije për Dosja.al se motra e Sulejmanit, të njohur ndryshe si ‘Çipuri’ është me mbiemër Elmazi dhe është nëna e Daut Elmazit, i cili ndodhet aktualisht në burg, për atentatin ndaj Inez Hajrullës, ngjarjes së ndodhur mëngjesin e 10 majit të një viti më parë, në kompleksin “Oslo” në Vlorë.
Fatmirësisht, tritoli që ishte vendosur në makinën e zonjës Elazi, të llojit ‘BMW X3”, nuk ka shpërthyer. Alarmi për lëndën plasëse, u dha mesditën e sotme, rreth orës 12:30, kur u vu në dijeni edhe Policia e Vlorës.
Mjeti u transportua tek policia e Vlorës dhe forcat xheniere bënë të mundur heqjen e tritolit që nuk ishte aktivizuar. Fakti që lënda është lënë pa shpërthyer, mendohet të ketë qenë një lloj mesazhi për familjet Sulejmani dhe Elmazi.
Armando Sulejmani, njihet për ngjajre të bujshme në të cilat është përfshirë. Vetëm një vit më parë, ai i shpëtoi një atentati tek zona e Ujit të Ftohtë në Vlorë, ku të vdekur mbetën, kunati i tij Arjan Hasani dhe shokun Orest Rexho.
42-vjeçarit nga Vlora, i është bërë një atentat në muajin maj të vitit 2016, në hyrje të banesës së tij në lagjen “Pavarësia” në Vlorë. Ai u qëllua me 11 plumba, por shpëtoi duke u plagosur vetëm me një plumb në krah.
“Çipuri” njihet si anëtar i bandës së Gaxhait, të akuzuar për konfliktet e tyre me familjen Llanaj. Llanajt dhe Gaxhajt kanë një sagë hakmarrje dhe ngjarje kriminale mes tyre, derisa në vitin 2015, ndodhi masakra e Çoles, ku pas një sherri në kazino u vranë 3 të rinj. Një nga të arrestuarit për masakrën është Aleksandër Llanaj, vëllai i Ferdinand Llanajt. Ferdinandit iu bë një atentat mafioz në viti. 2017 dhe i dyshuari kryesor ishte Armando Sulejmani.
Armando Sulejmani ka qenë i dënuar për vrasje me 20 vite dhe është liruar në rrethana të paqarta rreth 3 vite më parë. Ndërkohë në muajinshkurt të një viti më parë, një atentat mafioz iu bë Mikel Mehmetit, nga Selenica e Vlorës i njohur si anëtar i bandës së Llanajve.
