Një ngjarje e rëndë ndodhi mbrëmjen e djeshme në Korçë. Një 57-vjeçar u ekzekutua me armë në shtëpinë e tij. Viktima Gramoz Nako u gjet i mbuluar me gjak nga bashkëshortja e tij kur ishte kthyer në shtëpi.
Gramoz Nako jetonte në një apartament në lagjen nr.7 të qytetit së bashku me bashkëshorten. E pak orë pas ngjarjes mësohet se është vetëvrarë kunati i tij Sefedin Zenellari, 71 vjeç.
Deri më tani ka dyshime të forta se Sefedin Zenellari është vrasësi i kunatit të tij, Gramoz Nakos. Bëhet e ditur se ai ka vrarë veten në momentin që policia shkoi në banesë për ta shoqëruar drejt komisariatit.
Kujtojmë këtu se Gramoz Nako, i cili dy ditë më parë ishte kthyer nga pushimet në Turqi, humbi jetën pas breshërisë së plumbave.
Njoftimi i plotë i policisë:
Korçë. Në vijim të ngjarjes së ndodhur mbrëmjen e djeshme në lagjen nr 7, ku u gjet i vrarë me armë zjarri tip pistoletë, shtetasi G.N, 57 vjeç informojmë se: Autori i dyshuar i kësaj ngjarje është kunati i tij shtetasi S.Z, 71 vjeç, banues në Korçë, i cili mëngjesin e sotëm në momentin kur shërbimet e Policisë kanë shkuar për ta shoqëruar në Komisariat, është vetvrarë me armë zjarri tip pistoletë, në banesën e tij ku jetonte i vetëm.Grupi hetimor po punon për zbardhjen e plotë të rrethanave të ngjarjes.’’
