Drejtori i Përgjithshëm i Policisë Federale të Belgjikës Marc de Mesmaeker ka zhvilluar një vizitë në vendin tonë ku ka takuar Drejtorin e Përgjithshëm të Policisë së Shtetit Ardi Veliu.
Mësohet se gjatë takimit është vlerësuar si shumë e mirë marrëdhënia mes Policisë shqiptare dhe asaj belge.
Numri një i Policisë ka prezantuar para delegacionit belg rezultatet e arritura nga Policia e Shtetit në drejtim të parandalimit të kultivimit dhe trafikimit të kanabisit, si edhe mënyrën e funksionimit të OFL-së në zbatim të Aktit Normativ të datës 31 janar 2020.
Nga ana tjetër, Drejtori i Përgjithshëm i Policisë Federale të Belgjikës, Marc De Mesmaeker ka vlerësuar rezultatet e deritanishme të OFL-së, përpjekjet dhe rezultatet e arritura nga Policia e Shtetit në luftën ndaj krimit të organizuar dhe terrorizmit dhe punën e përbashkët të skuadrave hetimore.
Veliu teksa falënderoi Marc de Mesmaeker për mbështetjen, theksoi se Policia e Shtetit është e vendosur për të luftuar krimin e organizuar, duke bashkëpunuar ngushtë me partnerët ndërkombëtarë.
Po ashtu, palët ranë dakord që të punohet në drejtim të forcimit të bashkëpunimit ndërmjet FAST-it dhe strukturave homologe, për rritjen e bashkëpunimit në fushën e sigurisë rrugore dhe atë të rendit.
