Ministrja për Evropën dhe Punët e Jashtme, Olta Xhaçkaka zhvilluar ditën e sotme një takim “virtual” me Ministrat e Jashtëm të NATO-s. Gjatë fjalës së mbajtur në këtë takim ministrja Xhaçka ka dhënë një mesazh , në të cilin ka theksuar se vendi jonë mbetet i përkushtuar në garantimin e sigurisë kolektive për dekadat që do të vijnë.
“Shqipëria mbetet e përkushtuar në garantimin e sigurisë kolektive për dekadat që do të vijnë dhe mbështet konceptin e ri strategjik të nismës NATO 2030”, ka thënë ministrja Olta Xhaçka.
Gjithashtu Xhaçka paraqiti qëndrimet e Shqipërisë mbi çështjet e rëndësishme të vizionit NATO 2030, duke theksuar gjithashtu rëndësinë e forcimit të mëtejshëm të unitetit dhe kohezionit të Aleancës.
“Ka ardhur koha që qasja e NATO-s drejt Ballkanit Perëndimor të strukturohet dhe konsolidohet në një strategji të duhur të aleancës në rajon”, nënvizoi Xhaçka.
Takimet e Ministrave të Punëve të Jashtme dhe atyre të Mbrojtjes të vendeve anëtare të NATO-s, i paraprijnë përgatitjeve për takimin e nivelit të lartë të krerëve të shteteve dhe qeverive të vendeve të Aleancës, i cili do të mbahet më 14 qershor në Bruksel.
Ky samit pritet të hapë një kapitull të ri në marrëdhëniet transatlantike, duke dhënë një mesazh të vendosur mbi unitetin dhe kohezionin transatlantik, si dhe të marrë vendime strategjike mbi adaptimin e NATO-s në të ardhmen.
