Pas vendimit të Gjykatës së Lartë, e cila riktheu dhe njëherë për rishqyrtim çështjen për vulën e Partisë Demnokratike në Gjykatën e Apelit, kjo e fundit ka zbardhur dhe datën se kur do të rinisë gjykimi me themel i çështjes. Seanca do të mbahet më datë 11 Qershor në orën 10:00. Relatore e çështjes, që mban ende të ndarë Partinë Demokratiker është gjyqtarja Alma Ahmeti. Ndërkohë anëtare të trupës gjykuese janë Iliba Bezati dhe Elona Toro.
Në mars të vitit të kaluar, Gjykata e Tiranës, njohu si të ligjshëm Kuvendin e thirrur nga ish-kryeministri Sali Berisha dhe mbështetësit e tij, e po ashtu dhe vendimet e dala nga ky Kuvend, i cili shkarkoi të gjitha strukturat dhe figurat drejtuese të partisë së udhëhequr deri në atë kohë nga Lulzim Basha. Po atë ditë, Berisha dhe mbështetësit e tij morën kontrollin e selisë së partisë, pas protestës së dhunshme që u zhvillua më 8 janar të vitit 2022, teksa brenda godinës qëndronte Basha e përkrahësit e tij.
Vendimi u ankimua menjëherë nga deputeti Enkelejd Alibeaj. Përfaqësuesit e Berishës kërkuan nga gjykata e Apelit, mospranimin e ankimit per shkak se sipas tyre Alibeaj nuk legjitimohet për një akt të tillë, ose në alternativë, të pushojë ankimimin si të pabazuar në ligj dhe prova. Nga ana e tyre përfaqësuesit e Alibeaj kërkuan prishjen e vendimit të Gjykatës së Tiranës, dhe pushimin e çështjes ose në alternativë prishjen e vendimit dhe kthimin e çështjes për rigjykim.
