Të gjithë po prisnin sot që Gjykata e Lartë të dilte me një vendim sa i përket vulës së PD-së. Mirëpo ajo ka vendosur që kjo çështje të rishqyrtohet sërish në Gjykatën e Apelit me një tjetër trupë gjykuese.
Në njoftimin e bërë zyrtar, Gjykata e Lartë thekson qartë se Apeli ka bërë shkelje procedurale në vendimin e saj, duke mos u dhënë përgjigje kërkesave të palëve që ankoheshin.
Gjithahshtu thuhet se kjo çështje mund të zgjidhej vetëm nga ajo gjykatë.
Kujtojmë se Gjykata e Apelit ia dha vulën dhe simbolet Partisë Demokratike të Lulzim Bashës, duke e njohur kështu si PD-në zyrtare. Ndërsa grupi i rithemelimit me kryesues Sali Berishën ngriti pretendimet e tij, lidhur me këtë vendim, duke e ankimuar më pas në Gjykatën e Lartë.
Njoftimi:
Kolegji Civil i Gjykatës së Lartë njofton, se në datën 27.12.2023, mori në shqyrtim në dhomë këshillimi çështjen me nr. 90600-00296-00-2023 akti, me palë kërkues: Partia Demokratike e Shqipërisë, përfaqësuar nga Komisioni i Përkohshëm i Rithemelimit, me objekt: “Depozitim ndryshimesh statutore dhe vendimmarrje të Kuvendit Kombëtar.”
Në përfundim të shqyrtimit gjyqësor, Kolegji Civil arriti në përfundimin se Gjykata e Apelit të Juridiksionit të Përgjithshëm Tiranë, me vendimin nr. 44, datë 03.03.2023 ka lejuar shkelje procedurale që e bëjnë të cenueshëm vendimin e dhënë prej saj.
Kolegji konstaton se, Gjykata e Apelit të Juridiksionit të Përgjithshëm Tiranë nuk i ka dhënë përgjigje kërkesave të palëve në ankimet respektive, ndërkohë që kryesisht ka marrë në shqyrtim çështje për të cilat palët nuk i kanë ngritur si pretendime në ankim, dhe që gjithsesi nuk përbëjnë shkak për prishjen e vendimit dhe dërgimin e çështjes për rishqyrtim.
Kolegji vlerëson se pretendimet e ngritura në ankimet e paraqitura pranë Gjykatës së Apelit të Juridiksionit të Përgjithshëm Tiranë janë çështje të cilat mund të zgjidheshin vetë nga ajo gjykatë.
Në këto kushte, Kolegji Civil i Gjykatës së Lartë, mbështetur në nenin 480 dhe nenin 485, pika 1, shkronja “c” të Kodit të Procedurës Civile, vendosi:
“Prishjen e vendimit nr. 44, datë 03.03.2023 të Gjykatës së Apelit të Juridiksionit të Përgjithshëm Tiranë dhe kthimin e çështjes për rishqyrtim në po atë gjykate, me një trupë tjetër gjykuese”
