Presidenti i Serbisë, Aleksandar Vuçiç, ka lëshuar sërish deklarata të ashpra kundër gjyqësorit, duke e akuzuar hapur se qëndron në anën e protestuesve dhe se “merr para nga jashtë” për të liruar studentë e qytetarë të arrestuar gjatë demonstratave.
Në një intervistë për televizionin pro-qeveritar “Pink”, ai përdori gjuhë kërcënuese ndaj gjyqtarëve e prokurorëve, duke thënë se “janë të korruptuar nga OJQ-të e huaja” dhe “punojnë për shkatërrimin e shtetit”. “Këta njerëz nuk e bëjnë punën e tyre. Shihni nga paguhen, përveç pagave që u japin qytetarët, ata marrin para nga jashtë për të liruar ata që sulmuan policinë. Nuk është sekret”, deklaroi Vuçiç, duke i cilësuar si armiq të brendshëm.
Ai paralajmëroi se sapo të ndryshohet Kushtetuta, do të ketë reforma të thella në gjyqësor, një sinjal i qartë presioni ndaj pavarësisë së drejtësisë.
Në të njëjtën kohë, Vuçiç pranoi se shteti ka shpenzuar 50 milionë euro për sigurimin e protestave, të cilat i quajti “kriminale” dhe “tubime të paligjshme”. “Me këto para mund të kishim ndërtuar një spital në Serbi, por jo, na u desh të siguronim budallallëkun e tyre”, tha ai, duke fyer protestuesit.
Sipas presidentit, protestat janë “revolucione me ngjyra të sponsorizuara nga jashtë” dhe pjesëmarrësit “ekstremistë” që kërkojnë destabilizimin e vendit. Ai raportoi rreth 7,000 pjesëmarrës në Novi Sad dhe 9,300 në mbarë vendin, duke i minimizuar si shifra të papërfillshme.
Me këto sulme, Vuçiç jo vetëm që përpiqet të vendosë kontroll mbi sistemin e drejtësisë, por edhe të frikësojë qytetarët që protestojnë, duke u përpjekur të konsolidojë pushtetin e tij dhe të godasë çdo zë kritik.
