26-vjeçari Florian Tonuzi, i cili më 29 prill vrau me mjetet prerëse të vëllain e tij të vogël Bernard Tonuzin, ka dalë ditën e sotme para gjykatës për tu njohur me masën e sigurisë. Mësohet se trupa gjykuese ka vendosur për 26-vjeçarin “arrest me burg”, ndërsa mësohet se e vetmja mbrojtje e tij ka qenë se nuk mbante mend asgjë se si kishte ndodhur ngjarja e rëndë. Kujtojmë se mbrëmjen e 29 prillit vëllezërit Tonuzi po ktheheshin në banesën e tyre, pasi kishin qenë deri vonë te lokali i tyre në qendër të fshatit dhe pas një zënke Floriani goditi me mjet prerës thikë vëllain e tij të vogël. Edhe pse ai u dërgua në spital, nuk mundi të mbijetonte.
Një ditë më pas, Florian Tonuzi u arrestua nga policia teksa u pikas nga banorët që i ishte afruar banesës së tij para se i vëllai Benardi të përcillej për në banesën e fundit. Me gjithë tentativën për t’u larguar, Forcat e Ndërhyrjes së Shpejtë arritën ta arrestonin ku ishte fshehur në një kanal në fshatin Kurtbeg.
Kronologjia e ngjarjes: 26-vjeçari Florian Tonuzi dhe vëllai i tij 23-vjeçar, Benard Tonuzi, kanë qëndruar deri në mesnatë në një lokal në Maqellarë dhe më pas janë kthyer bashkë në shtëpi, me makinën e tyre, ku autori ka qenë në timon dhe vëllai i vogël në vend të parë. Kur kanë mbërritur në shtëpi, djemtë i kanë thirrur babait që t’iu hapte portën. Ky i fundit ka dalë jashtë, iu ka hapur portën fëmijëve, të cilët kanë hyrë në oborrin e shtëpisë dhe pikërisht aty ka ndodhur dhe ngjarja tragjike. 26-vjeçari e ka qëlluar vëllanë e tij me thikë brenda makinës, ndërsa i ati ka parë gjithë ngjarjen e tmerrshme.
