SHKODËR
Zbardhet dëshmia e Stjuart Smakajt, që vrau aksidentalisht shokun e tij Gledis Kraja, mbrëmjen e 17 gushtit në Shkodër.
Smakaj ka pranuar se ai e ka kryer vrasjen. Në deklaratën e tij në polici, Smakaj ka thënë se gjatë sherrit, Denis Halili ka ikur në drejtim të makinës së dizinfektimit.
Sipas tij, ky veprim i Halilit ka bërë që të dyshojë se ai do të merrte armë. Smakaj deklaroi se për këtë arsye, është ngjitur në katin e dytë të pallatit ku banonte, për të marrë armë dhe për t’u “përballur” me Denis Halilin.
Ai ka shtuar se nuk e ka ditur se pas makinës ishte edhe shoku i tij. “Kam qëlluar në drejtim të automjetit ku ishte Denisi, nuk e dija se aty ishte edhe Gledisi. E kam vrarë gabimisht”, tha Stjuart Smakaj në policinë e qytetit verior.
Smakaj sqaropi se sherri ka nisur pasi ai dhe vëllai i tij Sebastjani kishin porositur mobilie për shtëpinë e tyre e shkak është bërë vendi i parkimit.
Ndërsa, shtetasi Denis Halili, kur u mor në pyetje, tha se ka ikur në drejtim të automjetit për t’iu shpëtuar plumbave të Stjuart Smakajt, duke shtuar se aty Gledis Kraja nuk e ka lejuar që të futet në mjet.
“Kam ikur me shpejtësi, jam shtrirë dhe më pas kam ikur me vrap për t’i shpëtuar plumbave. Duke ikur, kam parë se Gledis Kraja kishte marrë plumba e ishte shtrirë në tokë”, ka thënë Halili.
