Para pak ditësh në fshatin Manati, u regjistrua një ngjarje e rëndë ku mbeti i vdekur shtetasi Lekë Lekgjonaj. I mituri dyshohet se ka vrarë për hakmarrje viktimën, pasi vëllai i Lekgjonajt i kishte vrarë të atin, Gjon Përvathi në vitin 2009.
Ndërkohë sot Gjykata e Lezhës ka lënë në burg të riun Florian Përvathi, i cili vrau me armë për hakmarrje 65-vjeçarin Lek Lekgjonaj. Jashtë ambienteve të Gjykatës ishin shumë familjarë të të riut, i cili qëlloi për hakmarrje, pasi i kishin vrarë të atin 13 vite më parë.
Kujtojmë se adoleshenti e kishte kryer për të marrë hakun e babait të vrarë nga vëllai i fqinjit në vitin 2009. Ndue Lekgjonaj vrau me armë zjarri Gjon Përvathin dhe në të njëjtën ditë gruaja i dha fund jetës, duke pirë fotoksinë. Shkak i krimit ka qenë konflikti që kanë pasur familjet Përvathi dhe Lekgjonaj për çështje pronësie.
Djali i viktimës Florian Përvathi nuk e harron hasmin duke marrë hak me vrasjen e vëllait të autorit të krimit, Lekë Lekgjonaj, duke e ekzekutuar këtë të fundit në afërsi të banesës së tij. Floriani ishte rritur jetim që prej moshës 4-vjeçare, kur babanë ja vranë, e pak orë më vonë e ëma iu vetëhelmua me fotoksinë.
