Një krim makabër ndodhi pasditen e djeshme në Durrës. Bashkëshorti vrau me thikë gruan e vet, 36-vjeçaren Hasbije Kuka.
Autori i ngjarjes së rëndë, Ardian Kuka 37 vjeç kishte ushtruar dhunë edhe herë të tjera ndaj saj. Viktima ka qenë me urdhër mbrojtjeje nga Kuka, pikërisht për këtë arsye.
Të tjera detaje janë zbardhur nga krimi makabër në familje. Shtëpia e familjes Kuka është në zonën periferike të Durrësit, në Spitallë. 37-vjeçari duhet t’i qëndronte larg gruas së vet, por ai i kishte shkuar për drekë në shtëpi.
Ata ishin konfliktuar dhe nga të dhënat paraprake dyshohet që në shtëpi ka qenë nëna me djalin 10 vjeç.
Duke parë debatin e ashpër midis dy prindërve, djali kishte shkuar për të kërkuar ndihmë te dajat e vet. Kur kanë ardhur e kanë gjetur gruan me disa plagë me thikë, rreth 5-6 goditje, njëra prej tyre pranë zemrës.
36-vjeçarja nuk ka mundur dot t’u mbijetonte plagëve të marra. E ndërsa mëngjesin e sotëm, autori i ngjarjes Ardian Kuka është gjetur nga policia i mbytur.
Njoftimi i Policisë
Më datë 20.07.2019, rreth orës 07:30, në Sektorin Rinia, Durrës, është gjetur i mbytur shtetasi Ardian Kuka 37 vjeç, banues në lagjen Nr.15, Durrës. Pranë vendit të ngjarjes është gjetur dhe automjeti i këtij shtetasi më të cilin dyshohet se u largua pas kryerjes së krimit.
Ky shtetas dyshohet të jetë autori i vrasjes së bashkëshortes së tij ndodhur ditën e djeshme. Grupi Hetimor po punon për zbardhjen e plotë të ngjarjes.
