Kristjan Cenaj është dënuar me burgim të përjetshëm nga Gjykata e Apelit të Juridiksionit të Përgjithshëm, pasi u shpall fajtor për vrasjen e 16-vjeçarit Mariglen Gjonaj, i zhdukur në vitin 2017.
Vendimi i Apelit ka lënë në fuqi dënimin e dhënë më herët nga Gjykata e Rrethit Gjyqësor Lezhë, duke e gjetur Cenajn fajtor për “vjedhje me pasojë vdekjen”. Sipas dosjes gjyqësore, ai e vrau adoleshentin për t’i grabitur një orë të markës “Rolex”.
Trupi i pajetë i Mariglen Gjonajt u gjet i groposur në zonën e Fushë Kuqes, shtatë vite pas zhdukjes së tij.
Kristjan Cenaj u arrestua në tetor të vitit 2022, pesë vite pas krimit. Ishte nëna e të miturit, Liljana Gjonaj, ajo që hodhi dyshimet e para për përfshirjen e Cenajt, duke deklaruar që në vitin 2015 se djali i saj ishte parë për herë të fundit me një të ri nga Mamurrasi, pikërisht Cenaj.
Pavarësisht se ajo kishte bërë kallëzim në polici në atë kohë, rasti u trajtua si largim nga banesa. Në dëshmitë e saj të asaj kohe, nëna e 16-vjeçarit shprehej e bindur se djali i saj ishte rrëmbyer ose keqtrajtuar për shkak të sendeve me vlerë që kishte me vete, duke u lutur që ta kthenin në shtëpi të gjallë.
“Iku në mëngjes në orën 8 dhe nuk u kthye më. Dëshmitarë nga fshati më kanë thënë se atë ditë ishte me Kristjan Cenajn. Nëse e kanë marrë për ndonjë gjë, t’ia marrin gjithçka, vetëm të ma sillnin djalin në shtëpi,” deklaronte në vitin 2015 Liljana Gjonaj.
Pas vitesh pritjeje dhe dhimbjeje, drejtësia ka vënë vulën e saj mbi një prej ngjarjeve më tronditëse të viteve të fundit.
