Siguria në vend është një temë që po diskutohet së tepërmi kohëve të fundit për shkak të shumë ngjarjeve të rënda të ndodhura në disa qytete të vendit.
Megjithatë nga studio e emisionit “Kjo Javë”zv/ministri i Brendshëm, Julian Hodaj, ka sqaruar edhe një herë se policia është e mobilizuar për të siguruar jetën e qytetarëve, ndërkohë që ka thënë se kjo duket edhe në aksionin e marrë për zëvendësimin e shumë prej strukturave drejtuese të policisë gjithë territorin e Shqipërisë.
Sipas tij ajo që ka ndodhur në Shkodër nuk është produkt i një dite apo një nate, por fryt i asaj që është “mbarsur” në këto 25-30 vitet e fundit.
“Pra, është një situatë e mbartur, sepse nuk lindën as sot as dje grupet kriminale, kanë qenë aty dhe kanë operuar në terren. Kjo që ndodhi janë episode të luftës ndërmjet, besoj dhe kjo është pista që besoj unë policia po ndjek, të luftës mes grupeve të ndryshme që kanë çuar në këtë lloj rezultati. Gjithsesi policia është e angazhuar fort, po mbështetet edhe nga Ministria e Brendshme dhe agjencitë e tjera ligjzbatuese dhe besoj shumë shpejt do ketë rezultate në këtë drejtim”, tha Hodaj.
Gjithashtu zv/ministri ka thënë se Shkodra është një nga qytetet ku ishte përqëndruar më shumë vëmendja dhe forca e ligjit, mirëpo lidhjet që ekzistojnë mës qyteteve janë shumë të forta dhe të afërta.
“ ‘Volvo 4’ kishte shumë njerëz por të shtrirë në 4 – 5 qytete. Shkodra ka qenë ndër qytetet që mbetet gjithmonë problematike, mbetet në vëmendje të policisë së shtetit, por kjo nuk do të thotë se vëmendja është hequr nga qytete të tjera.” -theksoi zv/ministri i Brendshëm.
