Një ngjarje e rëndë ka tronditur qytetin e Gjilanit të dielën në mesditë, ku pas të shtënave me armë zjarri, tre persona humbën jetën, ndërsa një tjetër mbeti i plagosur.
Autoritetet kanë shpallur në kërkim Mefail Shkodrën, i dyshuari kryesor për vrasjen e trefishtë.
Sipas zëdhënësit të Policisë për rajonin e Gjilanit, Ismet Hashani, rreth orës 12:30 në rrugën “Ibrahim Rugova” ndodhi incidenti fatal.
Mjeku kujdestar konfirmoi vdekjen e dy personave në vendngjarje, ndërsa një tjetër ndërroi jetë më vonë në spital. Një person i katërt ndodhet nën kujdesin e mjekëve. Policia dhe prokuroria kanë nisur hetimet për zbardhjen e plotë të rrethanave të ngjarjes.
Autoritetet kanë bërë thirrje për bashkëpunim me qytetarët për lokalizimin dhe kapjen e Shkodrës, duke publikuar fotografinë e tij dhe duke siguruar konfidencialitetin e informacionit. Çdo person që disponon informacione për vendndodhjen e tij mund të kontaktojë Policinë e Kosovës nëpërmjet stacioneve më të afërta, aplikacionit digjital “Lajmëro Policinë” apo numrave të kontaktit 192 dhe 03850807001.
Sipas hetimeve të para, motivi i krimit dyshohet të jetë konflikti për fajde. Mefail Shkodra, i njohur nga organet e drejtësisë për veprimtaritë kriminale në fushën e fajdes, ishte arrestuar në vitin 2024 për dhënie parash me fajde dhe shantazh ndaj viktimave, por u lirua pas katër muajsh paraburgim.
Në rrjetet sociale, Shkodra shfaqej me pamje luksoze, duke postuar foto me makina të shtrenjta si “Range Rover” dhe “BMW X5”. Ai gjithashtu kishte foto me figura të larta politike në Kosovë, përfshirë presidenten Vjosa Osmani, kryeministrin Albin Kurti, ministrin e Brendshëm Xhelal Sveçla, kryetarin e Prishtinës Përparim Rama dhe kryetarin e AAK-së Ramush Haradinaj.
