Një ngjarje e rëndë ndodhi mëngjesin e sotëm në Lushnje, ku u vra me armë zjarri një person dhe u plagosën 3 të tjerë. Me anë të një njoftimi zyrtar policia bën me dije se janë arrestuar dy nga autorët e dyshuar, për vrasjen e 30-vjeçarit në Garunjas të Lushnjes. Ngjarja e rëndë ndodhi pas një konflikti për një truall.
I vdekur mbeti Romeo Hasalla ndërsa të plagosur babai i tij Shuaip Hasalla, e dy vëllezërit e tjerë, Emiljano e Laert Hasalla. Autorët e dyshuar të ngjarjes janë Kastriot dhe Afrim Hasalla. Sipas njoftimit të policisë është arrestuar Afrim Hasalla dhe Marjus Hasalla, ndërsa Kastriot Hasalla ndodhet ende në kërkim. Romeo Hasalla kishte vetëm dy ditë që kishte ardhur nga Greqia dhe ishte baba i dy fëmijëve. Familjet ishin në konflikt të vjetër për pronën teksa rezulton se viktima me autorët ishin kushërinj të largët.
Njoftimi nga Policia
Kapen dhe vihen në pranga dy nga autorët e dyshuar të ngjarjes së ndodhur mëngjesin e sotëm në Garunjas të Lushnjës.
Vijojnë kontrollet intensive për kapjen e autorit tjetër të shpalluar në kërkim.
Strukturat hetimore të DVP Fier në bashkëpunim me shërbimet e Komisariatit të Policisë Lushnje në vijim të punës intensive për zbardhjen dhe dokumentimin e ngjarjes së ndodhur në fshatin Garunjas, kanë vijuar kontrollet për lokalizimin dhe kapjen e autorëve.
Si rezultat i kontrolleve të pandërprera gjatë ditës së sotme, nga shërbimet e Komisariatit të Policisë Lushnjë në bashkëpunim me shërbimet e Komisariatit të Policisë Divjakë, është bërë e mundur kapja e dy prej autorëve të dyshuar të shpallur në kërkim, shtetasit M. H., 20 vjeç dhe A. H., 42 vjeç, banues në Garunjas, Lushnjë.
Nga specialistët për Hetimin e Krimeve në Komisariatin e Policisë Lushnjë është bërë arrestimi i tyre për veprat penale “Vrasje në rrethana cilësuese” e kryer në bashkëpunim dhe “Vrasje në rrethana cilësuese” e kryer në bashkëpunim, e mbetur në tentativë.
Vijon puna nga shërbimet e Policisë për kapjen e shtetasit K. H.
