Renato Fredi Hoxhaj, 58 vjeç, mbeti i vrarë të dielën në hyrje të banesës së tij në Vlorë.
Ai u qëllua me armë zjarri sapo kishte mbërritur në shtëpi, rreth orës 06:00 të mëngjesit, ndërsa kthehej nga puna si roje objekti.
Sipas informacioneve, bashkëjetuesja e tij dëgjoi të shtënat dhe më pas e gjeti trupin e pajetë të Hoxhajt, duke njoftuar menjëherë policinë.
Viktima ishte i divorcuar prej vitesh dhe kishte dy fëmijë të rritur. Banorët e zonës e përshkruajnë atë si një njeri pa probleme apo konflikte.
Hetimet tregojnë se Hoxhaj është qëlluar nga një distancë e afërt me tre plumba, fillimisht në trup për ta neutralizuar dhe më pas në kokë.
Deri tani dyshohet se vrasja është kryer nga një autor i vetëm, i cili mund të jetë ndihmuar nga persona të tjerë për të marrë informacion mbi lëvizjet e viktimës.
Pas ngjarjes, policia ka marrë në pyetje rreth 10 persona, përfshirë familjarë, komshinj dhe kolegë, por dëshmitë e tyre nuk kanë ofruar ndonjë të dhënë të rëndësishme. Askush nuk ka parë autorin e krimit.
Sipas dëshmisë së bashkëjetueses së tij, e cila jetonte me të prej dy vitesh, 58-vjeçari nuk kishte shfaqur ndonjë shqetësim për kërcënime të mundshme.
“Ky vinte, shkonte në punë. Dilte ndonjëherë në natë të vona, edhe… unë isha në punë. Ikja në punë unë, në orën 19:30, të darkës, edhe vija deri nga ora 03:00 të mëngjesit. E kur vija e gjeja në shtëpi. Në gjumë. Edhe ngrihej nga gjumi ky, e ikte poshtë te lokali e shkonte pinte kafen aty. Rrinte aty gjatë ditës. Pastaj ikte, lëvizte. Ku di unë nga lëvizte ai. Se unë s’do ruaja atë se nga shkonte”.
Ajo tregoi se kishte dëgjuar të shtëna, por i kishte marrë për fishekzjarre, duke zbuluar më vonë trupin e pajetë pas rreth dy orësh.
Unë s’pash gjë. Unë isha brenda i thashë. Unë e dija se ishin fishekzjarre i thashë. Mendova i thashë se ishin fishekzjarre, mendova. Nuk dola i thashë, se po vishesha. Në atë kohë, i thashë unë, po vishja rrobat, e s’mund të dal. Si do dilja unë”.
E tronditur dhe në frikë, Rakipaj është larguar nga banesa ku jetonin bashkë, duke theksuar se ndjehet e pasigurt, pavarësisht mungesës së dijenisë për ndonjë konflikt të mundshëm të viktimës.
Grupi hetimor po vijon punën për sigurimin e provave. Janë sekuestruar dhe po analizohen materialet filmike të disa kamerave sigurie në zonë, ndërsa pistat kryesore të hetimit lidhen me konflikte të mundshme ose përfshirje në ndonjë ngjarje të pazbuluar.
Hetimet vazhdojnë nën drejtimin e Prokurorisë së Vlorës, ndërsa identiteti i autorit mbetet ende i panjohur.
