Asllan (Azgan) Menrica, autori i vrasjes së efektivit të Policisë Novruz Cenalia, këtë të hënë në Fier raportohet se është rrethuar nga Policia në zonën e Apollonisë. Efektivët po presin që të bjerë nata për të ndërhyrë pasi ai është i armatosur dhe mund të kundërpërgjigjet me zjarr. Autori i ngjarjes e qëlloi me plumb në kokë efektivin e Shqiponjave, i cili ishte rrugës për të marrë turnin. Shkak për ngjarjen, paraprakisht dyshohet të jetë bërë një konflikt i çastit, për të kaluar në një rrugë të ngushtë.
Raportohet se pasi ka qëlluar me plumb në kokë Cenalian, autori është larguar me një makinë ngjyrë blu, të cilën më pas e ka lënë tek shtëpia e dajës dhe është arratisur. Efektivi që mbeti i vrarë kishte rreth një muaj që ishte martuar, ndërsa momentin kur ndodhi ngjarja ishte duke ikur në punë pasi ishte turni i dytë. Deri më tani vrasja dyshohet të ketë ardhur pas një sherri të çastit për kalimin në një rrugë të ngiushtë. Për kontroll nga ajri është duke u përdorur një dron. Kryepolici Muhamet Rrumbullaku dhe ministri i Brendshëm Taulant Balla reaguan ashpër për ngjarjen. Ndërkohë për “kokën” e autorit, Policia ka vënë 30 mijë euro shpërblim për këdo që jep informacion.
