Shtetet e Bashkuara janë tronditur nga një krim i rëndë që përfshin vrasjen makabre të tre motrave të mitura, të cilat dyshohet se janë mbytur nga babai i tyre, 32-vjeçari Travis Decker.
Vajzat, Patin (9 vjeç), Evelyn (8) dhe Olivia (5), u gjetën të pajeta në pjesën e pasme të një kamioni pranë një kampingu në Wenatchee, në shtetin e Uashingtonit.
Hetimet paraprake treguan se trupat e vogëlusheve ishin të lidhura dhe me qese plastike në kokë. Ekspertiza mjeko-ligjore sugjeron se shkaku i vdekjes ishte asfiksia.
Vajzat ishin veshur me të njëjtat rroba që kishin veshur të premten e fundit, kur ishin marrë nga Decker për një vizitë të planifikuar. Ai nuk i kishte treguar nënës së tyre se ku do t’i çonte fëmijët.
Brenda kamionit u zbuluan gjithashtu gjurmë gjaku në formë pëllëmbe, ndërsa të dhënat nga telefoni celular i Decker konfirmojnë praninë e tij në vendin ku më pas u gjetën trupat.
Travis Decker, një ish-ushtarak i Gardës Kombëtare dhe instruktor i certifikuar në qendrën stërvitore të Fort Benning, konsiderohej i aftë për të mbijetuar në kushte ekstreme, falë trajtimit si “Ranger”.
Megjithatë, ai kishte nisur të përballej me probleme të rënda të shëndetit mendor. Ish-bashkëshortja e tij, Whitney, kishte kërkuar divorcin në vitin 2024 duke përmendur gjendjen e tij të paqëndrueshme psikologjike dhe agresivitetin në rritje.
Sipas dokumenteve të gjykatës, Decker ishte diagnostikuar me çrregullim të personalitetit kufitar dhe narcizëm, dhe besohet se kishte ndërprerë trajtimin mjekësor.
Në muajt e fundit, ai kishte pasur disa momente shpërthyese, përfshirë hyrjen me forcë në banesën e ish-bashkëshortes dhe sjellje kërcënuese ndaj vajzave.
Ndërkohë, autoritetet janë në kërkim të 32-vjeçarit, i cili akuzohet për rrëmbim dhe vrasje të trefishtë.
Një shpërblim prej 20 mijë dollarësh është vënë në dispozicion për këdo që ofron informacion që çon në kapjen e tij.
