Një prej vëllezërve Bushgjoka, të arrestuar për vrasjen e 23-vjeçarit Renis Dobra, ka dhënë dëshminë e tij para grupit hetimor.
Fation Bushgjoka ka pranuar se ka njohje me viktimën, duke sqaruar se janë takuar për herë të parë në Gjermani, ku kanë bashkëpunuar në aktivitet të paligjshëm, konkretisht në trafikimin e lëndëve narkotike.
Megjithatë, ai ka mohuar çdo përfshirje në vrasjen e Dobrës, duke pranuar se mes tyre kanë ekzistuar konflikte të mëparshme.
Ndërkohë, një tjetër i arrestuar për këtë ngjarje, Petrit Çakrri, ka pranuar pjesërisht praninë e tij në zonën ku ndodhi krimi ditën e ngjarjes, por ka këmbëngulur se nuk ka qenë i përfshirë dhe as që e njihte personalisht Renis Dobrën.
Ai ka treguar se kishte njohje vetëm me një nga vëllezërit, Kristi Bushgjokën, me të cilin ishte njohur gjatë një periudhe burgimi dhe më pas kishin ruajtur kontakte edhe pas daljes.
Çakrri ka deklaruar se është takuar me vëllezërit Bushgjoka atë ditë, pasi i kishin thënë se do të shkonin në fshatra për të kërkuar një sasi droge.
Sipas tij, gjatë rrugës janë ndarë në dy automjete, gjë që përputhet me pamjet e siguruara nga kamerat e sigurisë. Ai ka shtuar se në një moment, vëllezërit janë futur në një tjetër makinë, që sipas hetuesve dyshohet të jetë automjeti i viktimës, dhe i kanë kërkuar të largohej.
Çakrri ka mohuar përfshirjen në vrasje dhe ka deklaruar se për ngjarjen ka mësuar vetëm nga mediat. Edhe në dëshminë e tij, ashtu si Fatjon Bushgjoka, nuk ka pranuar asnjë lidhje direkte me krimin.
Si ndodhi ngjarja
Babai i Renisit, kallzoi në komisariat pasi nuk ka mundur të lidhet me të birin për disa orë. Menjëherë pas kallëzmit në komisariat efektivët nisën kërkimet. Pas disa orëve kërkime u bë me dije se trupi i 23-vjeçarit Renis Dobra u gjet pranë liqenit të Shkopetit, në fshatin Madhesh të Matit. Automjeti me të cilin i riu kishte dalë nga shtëpia kishte rënë në ujë. Një grup i posaçëm hetimor në drejtimin e Prokurorisë po heton për një vrasje të mundshme, pasi në trupin e të ndjerit u gjetën gjurmë të mbytjes me litar, pasi ka shenja të dukshme në qafë.
