Personi i identifikuar në foton e mësipërme dyshohet të jetë autori i vrasjes së Renato Hoxhajt, 58 vjeç, i cili u ekzekutua më 27 prill 2025 në Vlorë.
Ai shfaqet me kapelë në kokë dhe maskë në fytyrë, duke e bërë identifikimin më të vështirë.
Sipas informacioneve paraprake, një ditë pas krimit është arrestuar një person që dyshohet se ka ndihmuar autorin të largohet nga vendi i ngjarjes.
Hetimet janë në zhvillim dhe dyshohet për përfshirjen e më shumë personave, përfshirë mundësinë që porosia për vrasjen të ketë ardhur nga jashtë vendit.
Ngjarja ka ndodhur rreth orës 06:00 të mëngjesit, në momentin kur Hoxhaj po kthehej në banesë pas turnit të natës, ku punonte si roje në një objekt ndërtimi.
Ai është qëlluar nga afër me armë zjarri, duke marrë dy plumba në kokë dhe dy në trup. Arma e përdorur mendohet të ketë qenë pistoletë me gëzhoja kalibri 9 mm.
I pari që ka reaguar ka qenë bashkëjetuesja e viktimës, e cila ka dëgjuar të shtënat dhe e ka gjetur trupin e pajetë. Ajo ka shpërthyer në lot, duke thirrur “E vranë, mo, e vranë”, para se të merrej në pyetje nga policia. Deri tani, ajo ka treguar vetëm momentin kur ka zbuluar trupin dhe ka njoftuar autoritetet.
Viktima, i divorcuar prej vitesh dhe baba i dy fëmijëve të rritur, jetonte prej kohësh me bashkëjetuesen.
Pavarësisht se askush nga banorët nuk ka parë autorin në momentin e krimit, hetuesit po ndjekin disa pista, mes tyre edhe ndonjë konflikt të mundshëm apo përfshirje të mëparshme në ngjarje të tjera.
