Ministri i Brendshëm, Bledi Çuçi ka reaguar së fundmi në lidhje me ngjarjen e rëndë që ndodhi në Ishull Lezhë, ku mbeti i vrarë me armë zjarri një 44-vjeçari, Saimir Hoxha me detyrë nënkomisar i policisë.
Çuçi ka shkruar se është i tronditur nga ngjarja e rëndë dhe se nuk do të kishte dashur kurrë që Policia e Shtetit të kishte një dëshmor tjetër në luftën e saj të vazhdueshme me paligjshmërinë. Gjithashtu ai ka siguruar se personi i cili vrau policin do të marri dënimin e merituar.
Postimi i plotë:
I tronditur nga lajmi i kobshëm i vrasjes së oficerit të Policisë së Shtetit në Lezhë, Saimir Hoxha. Nuk ishte dashur që Policia e Shtetit të kishte një tjetër dëshmor në luftën e saj të vazhdueshme me paligjshmërinë. Dora e zezë që shtiu kundër tij do të marrë ndëshkimin më të ashpër sipas ligjit. Policia e Shtetit po bën gjithçka duhet në një operacion të gjerë për kapjen e autorit. Sado të kërkoj me kujdes fjalët për të shprehur ngushëllim për familjen Hoxha, zor se mund të gjej të atë të duhurën për të zbutur sadopak peshën e rëndë të këtij akti kriminal. Kurajo dhe forcë brenda vetes! Lufta me krimin është e vazhdueshme dhe kurrsesi që ne nuk do të dorëzohemi përballë askujt. Kurrë!
