Sot në sallën e gjyqit, pati përplasje të ashpra mes prindërve të studentit të ndjerë Marvi Mihali dhe familjarëve të katër të pandehurve të akuzuar për vrasjen e 22-vjecarit.
Në momentin kur të afërmit e të pandehurve pretenduan se familja Mihali ka kërkuar dëmshpërblim për jetën e të birit, situata u tensionua.
Me urdhër të trupës gjykuese, Mira Mihali doli jashtë për shkak se kishte thyer solemnitetin e gjykimit. Jashtë sallës së gjyqit Pavllo dhe Mira Mihali deklaruan se nuk bëjnë pazar me gjakun e të birit.
Pala e akuzuar sikurse edhe më herët, këmbëngul se ka një padi për dëmshpërblim nga familja e të ndjerit. Ndërkohë familja Mihali thotë se në drejtësia nuk vepron, ata paralajmërojnë se do të bëjnë vetëgjyqësi.
Kujtojmë se 22-vjeçari Marvi Mihali u vra pas një përleshje mes të rinjve për një karikues më 31 korrik të 2017. Prokuroria ka shpallur pretencën për 4 të akuzuarve, Dejvi dhe Eugen Bitrajt, si dhe vëllezërit Kridens e Marsel Alla për të cilët ka kërkuar denimë nga 18 deri në 25 vite burgim. Këtë të martë ishte mbrojtja që paraqiti argumentat e saj. Në seancën e datës 26 mars pritet shpallja e vendimit.
