Vrasja e Hamza Licit, vëllait të vogël të Ibrahim Licit, është një ngjarje e rëndë e planifikuar që nga gushti i vitit 2020 nga dy figura të njohura të botës së krimit, Astmer Bilali dhe Behar Bajri.
Në një bisedë të interceptuar mes tyre në aplikacionin “SKY”, Astmeri diskuton mundësinë për të vrarë Hamzanë, duke thënë se ka folur me dikë që mund ta nxjerrë atë për t’u vrarë. Behar Bajri shprehet i gatshëm të sigurojë informacion për lëvizjet e familjes Lici dhe për planifikimin e vrasjes.
Në vitin 2020, bisedat e dyshuarve shpalosin detaje të tjera për planin, duke përmendur figura të tjera të përfshira, si Dor Duli dhe Ibrahim Lici, të cilët dyshohet se mund të ishin shënjestër i hakmarrjes për vrasjen e disa anëtarëve të grupit të Bilalit.
Këto biseda tregojnë një përpjekje për të mbledhur informacion dhe për të siguruar njerëzit dhe armët e nevojshme për realizimin e krimit.
Në 30 tetor 2024, vrasja e Hamza Licit u realizua në Dobraç, një zonë e Shkodrës e njohur për lidhjet me grupin “Bajri”. Hamza Lici, së bashku me Arlind Bushatin, u qëlluan me breshëri automatiku nga një makinë tip “Range-Rover”, e cila ishte paraqitur disa ditë më parë si një automjet i policisë. Pavarësisht se ata ishin shënjestrat kryesore, në ngjarje mbetën të vdekur edhe dy qytetarë të pafajshëm, Flutura dhe Bashkim Basha.
Policia dhe Prokuroria e Shkodrës e lidhin këtë ngjarje me një hakmarrje për vrasjen e Astrit dhe Brahim Bilali, anëtarë të familjes Bilali, të cilët u vranë në vitin 2019. Plani i vrasjes, që fillimisht ishte projektuar nga Astmeri dhe Behar Bajri në vitin 2020, duket se u realizua tani, me ndihmën e bashkëpunëtorëve që ata kishin jashtë burgut, përmes një organizimi të mirëplanifikuar dhe përdorimit të grupeve të krimit që veprojnë në rrugët e Shkodrës.
