Edhe pse kanë kaluar 22 vite nga vrasja e liderit të studentëve dhe ish-deputetit Azem Hajdari, ende nuk dihet sesi ndodhi saktësisht.
Në një intervistë për “Top Talk” gazetari Artan Hoxha listoi emrat e 5 personave që mund të rihapin dhe zbardhin plotësisht vrasjen e Hajdarit.
Hoxha tha se personat që duhet të thirren në gjykatë për të dhënë dëshmi të plotë janë ish-truproja e Hajdarit, Zenel Neza, ish-kryeministri Sali Berisha, ish-truproja e Berishës Izet Haxhia, Jaho Osmani dhe Bujar Dajo.
“I pari është Zenel Neza, që ka dhënë vetëm një dëshmi me letërporosi. Sali Berisha që nuk ka qenë në gjykatë. Jaho Osmani, i cili ka dhënë një deklarim të cunguar dhe ka thënë se unë do them të vërtetën nëse vjen edhe Sali Berisha në gjykatë dhe i katërti është Izet Haxhia. Plus është dëshmitari tjetër Bujar Dajo. Këta duhet të kërkojnë hapjen e procesit. Nëse thonë që motivi është për hakmarrje, unë them se çështja duhet të hapet”, u shpreh ai në emisionin “Top Talk”.
Kujtojmë se kur ndodhi atentati, Azem Hajdari shoqërohej nga dy truprojat e tij, Zenel Neza dhe Besim Çera. Ky i fundit mbeti i vdekur gjatë shkëmbimit të zjarrit, ndërsa Neza mbeti i plagosur dhe është larguar nga Shqipëria.
