Një ngjarje tragjike ka tronditur kryeqytetin shqiptar këtë të hënë, ku gjatë një seance gjyqësore në Gjykatën e Apelit në Tiranë, një person i armatosur hapi zjarr brenda sallës, duke vrarë gjyqtarin Astrit Kalaja dhe plagosur dy persona të tjerë.
Sipas raportimit të The Guardian, policia shqiptare bëri të ditur se autori, një 30-vjeçar me inicialet E. Sh., qëlloi ndaj gjyqtarit Kalaja, i cili humbi jetën ndërsa po transportohej drejt spitalit. Dy personat e tjerë të plagosur gjatë seancës nuk ndodhen në rrezik për jetën.
Autori u largua fillimisht nga vendi i ngjarjes, por u arrestua pak orë më vonë nga forcat e policisë, të cilat sekuestruan edhe armën e përdorur në sulm, një pistoletë revolver.
Autoritetet nuk kanë dhënë ende detaje mbi motivet e këtij akti të rëndë apo mbi natyrën e çështjes që po shqyrtohej në sallë. Nga të dhënat e publikuara në faqen zyrtare të gjykatës, seanca i referohej një mosmarrëveshjeje pronësie.
“The Guardian” thekson se kjo ngjarje ndodh në një kohë kur sistemi gjyqësor në Shqipëri po përballet me vonesa të gjata dhe mungesë të theksuar burimesh, si pasojë e reformës në drejtësi të nisur në vitin 2016 me mbështetjen e Bashkimit Europian dhe Shteteve të Bashkuara. Sipas raportimit, dhjetëra mijëra çështje gjyqësore janë shtyrë për vite me radhë, duke rënduar ndjeshëm funksionimin e sistemit dhe duke rritur frustrimin tek qytetarët.
Vrasja e gjyqtarit Astrit Kalaja ka tronditur opinionin publik dhe ka hapur një debat të gjerë mbi sigurinë e gjykatave dhe klimën e tensionuar brenda sistemit të drejtësisë shqiptare.
