Detaje të reja janë mësuar lidhur me vrasjen e Eraldo Nevruzit, 31-vjeçarit, i cili u vra nga pronari i hotelit “Greccia”, Gerald Shehu vetëm pak ditë më parë. 21-vjeçari Nevruzi kishte shkuar për të punuar si recepsionist në hotelin ku edhe u vra dhe më pas iu zhduk trupi nga autori i vrasjes së tij. Sipas dëshmive që ka mbledhur gazetarja Klodiana Lala për emisionin e saj “Në Shënjestër”, i riu nga Tirana kishte shkuar duke kërkuar punë në zonën e barit të hotelit, por si përfundim nisi të punonte në recepsion. Zakonisht, turni për të niste në orën 23.00 të mbrëmjes dhe e linte në mëngjes, por natën që u vra kishte shkuar më herët se zakonisht.
Sipas dëshmisë së koleges së tij, që mbulonte turnin e drekës dhe që këmbehej me Eraldon gjatë turnit të natës, atë mbrëmje ai kishte shkuar një orë më parë në punë dhe i kishte kërkuar që të largohej.
“Eraldo kishte vetëm pak ditë që kishte ardhur të punonte në hotel. Atë natë ai u paraqit për të marrë turnin në orën 22.00, pra një orë më herët. Gjë që në fakt më çuditi, por ai nuk më dha arsye, pse po e merrte punën përpara orarit zyrtar të ndërrimit të zakonshëm të turneve. Pastaj nuk e takova më. E mësova të nesërmen nga Policia se çfarë kishte ndodhur,”-tregoi ajo para hetuesëve.
Edhe pse ngjarja u zbulua, gjetja e trupit të viktimës ishte sfida e vërtetë për Policinë e Shtetit. Kufoma e të riut u gjet vetëm pasi autori Gerald Shehu tregoi gjatë marrjes në pyetje për hetuesit greke se mbrëmjen e krimit, pasi e kishte hedhur trupin në portobagazhin e makinës, e kishte transportuar më tej në një gurore.
Atje u gjet, i dhunuar dhe me një plumb në kokë gati 48 orë pas zhdukjes.
Përveç Shehu, për vrasjen janë arrestuar edhe dy punonjësit e tjerë të hotelit, David Larti dhe Daniel Qose. Dy të rinjtë akuzohen se zhdukën sendet personale të vitkimës, dhe çdo gjë tjetër që do ishte provë, duke i djegur në furrën e picave. Të dy autorët kanë shprehur pendesë për veprimin që kanë bërë, duke thënë se kanë qenë nën kërcënimin e armës.
“E ndihmuam pasi na kërcënoi me armë se do të na vriste,”- janë shprehur ato para togave të zeza.
