Një hije skandali po përfshin krimin e ndodhur pak ditë më parë në Pogradec për vrasjen e Egli Progës. Në fillim deklaratat kontradiktore të Policisë, tani Prokuroria e cila ka zbutur akuzën ndaj Denis Meçes, autori që dhunoi për vdekje 42-vjeçarin, babai i dy fëmijëve të mitur.
Nipi i ish-zyrtarit të lartë socialist shmang dënimin me 20 vite burg nëse lihet në fuqi vendimi për akuzën e zbutur
Policia bëri të ditur se e ka referuar ngjarjen në Prokurori si vrasje me dashje, e cila sipas kodit penal dënohet nga 10 deri në 20 vjet burgim.
Por prokuroria, pas 48 orësh, kur e ka dërguar dosjen për vlerësim në gjykatë ka ndryshuar akuzën për Denis Meçen, duke e referuar tashmë ngjarjen si vrasje nga pakujdesia, duke e zbutur atë në maksimum.
Kjo vepër penale dënohet me gjobë ose me burgim deri në 5 vjet. E thënë ndryshe, rrahja brutale që Denis Meçe i ka bërë Egli Progës, që ka shkaktuar vdekjen e këtij të fundit, nga prokurori i çështjes është cilësuar si vrasje nga pakujdesia. Këtë masë e ka konfirmuar mesditën e sotme edhe gjykata duke e lënë atë në arrest me burg.
