Ngjarja absurde që tronditi Durrësin në orët e para të 22 tetorit, ku dy të rinj humbën jetën për një konflikt banal në një lokal në Manëz, ka marrë një tjetër kthesë pas hetimeve të thelluara të Policisë së Durrësit dhe Prokurorisë. Katër persona janë arrestuar, ndërsa dy të tjerë janë shpallur në kërkim, mes tyre edhe autori i dyshuar i njërit prej vrasjeve.
Sipas njoftimit zyrtar të Policisë, janë arrestuar për moskallëzim të krimit:
E. C., 25 vjeç, E. K., 21 vjeç, si dhe vëllezërit T. B., 37 vjeç dhe E. B., 34 vjeç, të gjithë banues në Manëz.
Në kërkim janë shpallur Daniel Pepa, 21 vjeç, banues në Manëz, i dyshuar për “vrasje me dashje” dhe “mbajtje pa leje të armëve të zjarrit”, si dhe G. A., 30 vjeç, banues në të njëjtën zonë, i akuzuar për “përkrahje të autorit të krimit”, “mbajtje pa leje të armëve” dhe “moskallëzim të krimit”.
Hetimet kanë zbardhur me detaje dinamikën e përplasjes fatale. Rreth orës 01:25 të mëngjesit, Daniel Pepa kishte hyrë në lokal dhe ishte konfliktuar verbalisht me kamarierin, pasi ky i fundit i kishte thënë se ekspresi i kafesë ishte fikur. Në debat ishte përfshirë edhe Flori Paluçi, 33 vjeç, i cili ndodhej në lokal me disa shokë, mes tyre i arrestuari E. C..
Pas shkëmbimit të fjalëve dhe ofendimeve, Daniel Pepa është larguar me automjet, por është kthyer menjëherë më pas i shoqëruar nga E. K. dhe Aranit Kurti, 23 vjeç, që ishte miku i tij. Sipas hetimeve, kur tre të rinjtë kanë tentuar të futen sërish në lokal, Flori Paluçi ka dalë jashtë dhe dyshohet se ka qëlluar i pari me armë zjarri në tokë, si paralajmërim.
Në atë moment, Daniel Pepa ka hapur zjarr në drejtim të Paluçit, duke e plagosur rëndë. Flori Paluçi, i plagosur, ka arritur të qëllojë në drejtim të grupit përballë, ku plumbat kanë prekur Aranit Kurtin, që mbeti i vdekur në vend. Brenda pak sekondash, përplasja mes djemve të një zone të vogël u kthye në vrasje të dyfishtë.
Pas të shtënave, Daniel Pepa dhe bashkëfshatari i tij G. A. janë larguar me shpejtësi nga vendngjarja, ndërsa Flori Paluçi dhe Aranit Kurti u gjetën pa shenja jete pranë lokalit.
Ngjarja, që nisi nga një mosmarrëveshje për një kafe, ka tronditur vendin për absurditetin e saj. Të dy viktimat ishin të njohur në zonë, ndërsa të rinjtë e përfshirë kishin lidhje miqësore e familjare mes tyre.
Policia ka sekuestruar pamje sigurie dhe prova balistike që pritet të ndihmojnë në saktësimin e sekuencës së të shtënave dhe identifikimin e armëve të përdorura.
“Në drejtimin e Prokurorisë po punohet intensivisht për të siguruar çdo provë që do të ndihmojë dokumentimin e përgjegjësisë penale të secilit prej personave të përfshirë në këtë rast”, njofton Policia e Durrësit.
Ndërkohë, forcat e rendit po zhvillojnë kërkime të zgjeruara për kapjen e Daniel Pepës dhe G. A., që ndodhen ende në arrati.
Një debat i çastit, disa fjalë të nxituara dhe një armë e gatshme për përdorim mjaftuan që një natë e zakonshme në Manëz të përfundojë me dy të vrarë dhe gjashtë të rinj të përfshirë në zinxhirin e një tragjedie që tronditi gjithë vendin.
