Pas hetimeve të mëtejshme lidhur me vrasjen e biznesmenit Bujar Nasufi, të ndodhur më 12 janar në kryeqytet, kanë dalë detaje të reja.
Pas shqyrtimit të kamerave të sigurisë, është zbuluar se autori i krimit është nisur nga një lagje e Kombinatit dhe ka shkuar në Selitë e Vogël, ku e ka pritur viktimën për më shumë se 15 minuta në një rrugicë pranë shtëpisë së tij.
Hetimet tregojnë se autori e njihte mirë zonën, pasi shmangu rrugët kryesore dhe përdori vetëm rrugica alternative.
Pas vrasjes, autori është larguar me motor dhe ka djegur mjetin në kodër Sharrë, afër Kombinatit.
Familja Nasufi, me origjinë nga Berati, jeton prej vitesh në këtë zonë dhe ka disa biznese.
Ata kanë theksuar se ndarjet e pronave mes vëllezërve janë bërë që herët dhe nuk ka pasur konflikte mes tyre.
Fqinjët e viktimës gjithashtu kanë pohuar se Bujar Nasufi ishte një person i qetë dhe nuk kishte pasur probleme të dukshme.
