Vrasja e biznesmenit Rruzhdi Hoxha, ka tronditur të gjithë opinionin publik për shkak të mënyrës sesi u veprua për zhdukjen e kufomës së tij e cila u gjet në një greminë në një zonë të thellë të Tiranës.
Prokuroria ka mbyllur hetimet për vrasjen e biznesmenit Ruzhdi Hoxha, i cili u gjet i pajetë dhe i mbuluar me zhavor në një humnerë në Qafë Mollë në Dajt.
Pas hetimeve, organi i akuzës ka kërkuar arrest në burg për Ferdinand Rrushin, pasi akuzohet për rrëmbimin dhe vrasjen e 43-vjeçarit. Po ashtu prokuroria ka kërkuar të njëjtën masë sigurie edhe për vëllain e autorit të dyshuar kryesor, pasi pretendohet se ai e ka ndihmuar që të fshihte kufomën.
Pajtim Rrushi akuzohet si bashkëpunëtor në vrasje dhe dyshohet se ka fshehur makinën që u përdor në krim.
Gjetja e kufomës së biznesmenit Ruzhdi Hoxha disa ditë pas zhdukjes u bë e mundur nga një telefonatë e fundit, qelizat e së cilës arritën të identifikojnë një nga autorët e dyshuar. Paçka alibive të Ferdinand Rrushit, provat janë një plus për hetimin e krimit makabër të ekzekutimit dhe hedhjes së trupit në një humnerë në qafë mollë, në zonën e Dajtit.
Dëshmia e të arrestuarit Ferdinand Rrushi nuk ka qenë bindëse. Madje, ajo ka shërbyer si indicie e parë për zbulimin e krimit.
Por dëshmia që e vë autorin e dyshuar me shpatulla pas murit është një fakt tjetër. Bëhet fjalë për mikun e viktimës, që në dëshminë e dhënë në polici, tregoi se e ka parë shokun e tij për herë të fundit teksa hipte në një makinë tip Pasat ngjyrë gri e errët bashkë me Fredi Rrushin dhe dy të tjerë.
