Edoardo Sarchi, 44 vjeç, sipërmarrës italian në fushën e pasurive të paluajtshme, u vra të shtunën në fshatin Salari të Tepelenës. Lajmi ka marrë jehonë të gjerë në median italiane, ku “Corriere della Sera” ngre një sërë pikëpyetjesh mbi zbardhjen e ngjarjes.
Sipas shkrimit të së përditshmes italiane, ekzistojnë shumë boshllëqe dhe kontradikta në hetimin e këtij atentati. Gazeta thekson se gruaja shqiptare e Sarchit, e cila zotëron gjithashtu aksione në kompani, vendosi që ai të varrosej menjëherë, pa autopsi dhe pa kryer procedurat standarde hetimore. Ky fakt, sipas Corriere-s, ka shtuar dyshimet për një mbulim të mundshëm të së vërtetës.
Raporti i medias italiane sqaron se Sarchi nuk u vra me armë zjarri, por u godit për vdekje me shkop në kokë. Po ashtu, dyshohet se personi i shpallur në kërkim nga policia nuk ka lidhje me ngjarjen. Të tre shokët që e shoqëronin atë ditën e vrasjes kanë dhënë versione të ndryshme. Njëri pretendoi se u sulmuan nga një i panjohur i armatosur, një tjetër foli për një konflikt që degjeneroi në përplasje, ndërsa një version tjetër e paraqiti ngjarjen si “aksident gjuetie”. Megjithatë, asnjë gëzhojë nuk u gjet në vendngjarje, pasi arma e përdorur, sipas të dhënave, ishte një shkop dhe jo armë zjarri.
“Corriere della Sera” thekson se zakonisht ekspertiza mjeko-ligjore ofron të dhëna kyçe për zbardhjen e rasteve të tilla, por kjo nuk ndodhi pasi trupi nuk u ekzaminua. Për më tepër, funeralet u organizuan në mënyrë private dhe me nxitim, duke e mbyllur praktikisht terrenin për hetime të mëtejshme.
Personi i shpallur në kërkim për vrasje, mbajtje të paligjshme të armëve dhe trafik droge, është një 48-vjeçar nga e njëjta zonë. Në banesën e tij policia gjeti armë gjahu dhe fara kanabisi.
Në analizën e saj, gazeta italiane shkruan se Shqipëria është një vend i ri dhe në zhvillim, i lidhur ngushtë me qeverinë italiane, por ngjarje të tilla të errëta dhe të mbuluara me mister e rikthejnë imazhin e vendit prapa në kohë, duke nxjerrë në pah një mur heshtjeje dhe skenarë të paqartë rreth krimit.
