Pasditen e djeshme, administratori i njësisë Kote në Vlorë mbeti i vrarë pas një sherri për çështje pronash. Viktima Argjil Gjika ndërhyri për të shuar konfliktin mes disa personave, ku i plagosur mbeti edhe një 19-vjeçar me inicialet A. B.
Personat e arrestuar janë Jaçe Bejtaj, Namik Bejtaj dhe 19-vjeçari i cili mbeti i plagosur Arif Bejtaj. Po ashtu nga ana e policisë është shpallur në kërkim shtetasi M .P. (B), 32 vjeç, banues në Vlorë dhe po punohet për kapjen e tij.
Tre autorët e dyshuar për ngjarjen e rëndë janë të afërt me njëri-tjetrin. Kujtojmë se ngjarja e rëndë ndodhi pas një konflikti pronash, ku administratori ndërhyri për të qetësuar situatën midis këtyre personave.
Këta shtetas në bashkëpunim me njëri-tjetrin për motive të dobëta kanë tentuar të vrasin me armë zjarri tip pistoletë dy vëllezërit F. O. dhe A. O., (70 dhe 65 vjeç), por pas ndërhyrjes për të shuar konfliktin humbi jetën Kryetari i Njësisë Administrative Kotë, shtetasi Argjil Gjika.
Njoftimi i plotë i policisë:
Më datë 11.06.2019, rreth orës 14:20, në fshatin Petë të Selenicës, pas një konflikti me armë zjarri midis disa personave, janë plagosur shtetasit A. B., 19 vjeç dhe A. Gj., 51 vjeç, ku si pasojë ky i fundit ka humbur jetën në Spitalin e Vlorës.
Pas hetimeve të kryera, dëshmive dhe provave të administruara, Policia ka zbardhur ngjarjen, duke vënë para përgjegjësisë penale autorët e dyshuar:
N.B., 30 vjeç (arrestuar)
J.B., 22 vjeç (arrestuar)
A.B., 19 vjeç (arrestuar)
Të tre këta shtetas janë me banim në fshatin Mavrovë. Gjithashtu është shpallur në kërkim shtetasi M .P. (B), 32 vjeç, banues në Vlorë dhe po punohet për kapjen e tij.
Këta shtetas në bashkëpunim me njëri-tjetrin për motive të dobëta kanë tentuar të vrasin me armë zjarri tip pistoletë dy vëllezërit F. O. dhe A. O., (70 dhe 65 vjeç), por pas ndërhyrjes për të shuar konfliktin humbi jetën Kryetari i Njësisë Administrative Kotë, shtetasi A. Gj.
Materialet në ngarkim të këtyre shtetasve iu referuan Prokurorisë, për veprat penale “Vrasja në rrethana të tjera cilësuese” kryer në bashkëpunim dhe “Mbajtja pa leje e armëve dhe municioneve luftarake”.
