Policia greke ka publikuar identitetin e katër personave të komunitetit rom, të shpallur në kërkim për vrasjen e një fëmije dhe tentativën për vrasje të prindërve të tij.
Ngjarja ka ndodhur më 1 nëntor të këtij viti, në zonën e Makropoulos, ku një automjet u qëllua 15 herë me dy armë zjarri.
Një automjet tjetër u ndal paralelisht me automjetin tip “Peugeot”, ku udhëtonin një çift bashkëshortësh, nëna shtatzënë dhe dy fëmijët e tyre, një vajzë dhe një djalë 5-vjeçar.
Dy persona kanë zbritur nga mjeti dhe kanë hapur zjarr ndaj tyre. Si pasojë e të shtënave, fëmija 5-vjeçar, A.A., ka marrë një plumb në kokë dhe ka ndërruar jetë.
Katër personat e shpallur në kërkim janë romë nga Shqipëria dhe janë identifikuar si Agron Tahiri, 48 vjeç, nga fshati Rom në Fier, dy djemtë e tij, Evagjelo Zafiropoulo, 28 vjeç, dhe Dhimitrio Zafiropoulo, 25 vjeç, si dhe kushëriri i tyre Nektario Petropoulo, 34 vjeç.
Mësohet se familja e 5-vjeçarit kishte pasur mosmarrëveshje me autorët e dyshuar për çështje të drogës.
Burime nga policia thonë se mes dy grupeve kishin ndodhur edhe tre incidente të tjera të ngjashme. I pari ka ndodhur katër vite më parë në Agios Panteleimonas, ku pati një shkëmbim zjarri. Pas një viti ka pasur një tjetër përplasje në Koropi, ndërsa një tjetër ka ndodhur në vitin 2022.
Babai i fëmijës 5-vjeçar ka qenë i burgosur për një çështje të lidhur me drogën dhe është liruar disa kohë më parë.
Po ashtu, dy familjet janë raportuar të kenë pasur probleme të mëparshme me policinë.
