Pas një seance maratonë që zgjati gati 11 orë, gjykata vendosi të lërë në paraburgim tre personat e akuzuar për vrasjen e 41-vjeçarit Altin Arapaj në Rafina, ngjarje që ndodhi të enjten e kaluar.
Mikel Selimaj, 46 vjeç, përballet me akuzën e “vrasjes me dashje”, ndërsa dy të tjerët akuzohen për “bashkëpunim në vrasje”.
Ngjarja ka marrë përmasa thriller-i për shkak të detajeve që dolën në dritë. Pasi u qëllua në faqe, Arapaj arriti të telefononte partneren e tij, duke i pëshpëritur fjalët e fundit: “Më ndihmo… Keli më qëlloi në kokë. Po vdes. Më gjej, nuk e di ku jam.”
Selimaj, emri i të cilit u identifikua nga vetë viktima në momentet e fundit, u përpoq të distancohej nga përgjegjësia penale.
Në deklaratën e tij të bërë publike nga portali “Zungla”, ai tha se ngjarja ndodhi nën ndikimin e drogës, dhe pretendoi se as viktima, as ai nuk kishin qenë në gjendje të qartë mendore.
“Unë nuk i kam kryer veprimet për të cilat akuzohem. Në fakt, unë jam i varur nga droga dhe kur ndodhi incidenti, si unë ashtu edhe i ndjeri ishim nën ndikimin e drogës. Në fakt, dy ditë më parë, ne përdornim kokainë së bashku dhe ndërsa viktima këmbëngulte të mos kthehej në shtëpinë e tij, unë e nxita të kthehej te partnerja dhe fëmijët e tij. Rasti nuk ka të bëjë fare me larje hesapesh apo trafik droge, të cilat mund të çojnë në një akt të tillë. Për më tepër, arma e krimit nuk ishte e imja, por e viktimës, e cila për ndonjë arsye të pashpjegueshme bëri një lëvizje për ta përdorur dhe, ndërsa unë po përpiqesha të mbrohesha dhe ta çarmatosja, ajo shkrepi dhe plumbi e goditi në faqe.Pas të shtënave, viktima foli me gruan e tij. Ne kemi qenë miq me viktimën për njëzet vjet, kemi përdorur kokainë së bashku, dhe unë e kam ndihmuar edhe me punët e tij personale, konkretisht me problemet që i kishin krijuar dy shitës makinash, të cilat nuk po ia jepnin makinat, dhe unë ndërhyra që të mos i zhvatnin paratë”, tha ai.
Sipas tij, Arapaj ka ecur 130 metra nga vendi i ngjarjes dhe tani po kërkon raportin mjeko-ligjor për të përcaktuar shkakun e saktë të vdekjes.
Hetimet vijojnë, ndërsa autoritetet po analizojnë dëshmitë dhe provat për të sqaruar tërësisht rrethanat e vrasjes.
