Policia e Tiranës ka publikuar të tjera detaje në lidhje me vrasjen e kryer dje në kryeqytet në rrugën “Myslym Shyri”.
26-vjeçari Indrit Çelaj ndërroi jetë pak orë më parë në Spitalin e Traumës, pasi u plagos me plumb në kokë, teksa ishte duke montuar një kondicioner në një vilë 3 katëshe që është në proces rikonstruksioni.
Të dyshuar si autorë të ngjarjes janë dy vëllëzër, të cilët janë djemtë e pronarit të vilës ku po punonte viktima dhe një koleg i tij. Policia ka bërë të ditur se janë arrestuar katër persona, midis tyre edhe pronari i vilës. Të katërt akuzohen për fshehje të krimit dhe “vrasje në bashkëpunim”.
Indrit Çelaj nga Mallakatra, ishte teknik kondicionerësh dhe po punonte në vilën e Bujar Kusit për të kondicionuar të gjithë vilën. Mësohet se ngjarja ka ndodhur pas një konflikti të çastit, për ujin e kondicionerit.
Të dyshuarit për vrasjen e të riut janë dy vëllezërit Friseldo dhe Albano Kusi.
Policia njoftoi se Griseldo Kusi, 31 vjeç, në bashkëpunim me vëllain e tij, Albano Kusi 28 vjeç, pas një konflikti të çastit me Indrit Çelajn, ka qëlluar me plumb në kokë 26-vjeçarin, i cili ndërroi jetë mëngjesin e sotëm.
54-vjeçari Bujar Kusi është babai i dy djemve Griseldo dhe Albano Kusi.
Të arrestuarit e tjerë janë Edmond Sula, 43 vjeç, i cili akuzohet për veprat penale “Vrasja me dashje” në bashkëpunim, “Prodhimi dhe mbajtja pa leje e armeve luftarake dhe e municionit” dhe “Përkrahja e autorit të krimit”.
Në pranga kanë rënë Ferdinand Bakalli dhe Luan Çaka të cilët akuzohen për veprat penale “Moskallëzimi i krimit” dhe “Veprime që pengojnë zbulimin e së vertetës”, pasi dyshohet se kanë qenë prezent ne momentin që ka ndodhur ngjarja dhe nuk kanë njoftuar policinë.
Personi tjetër i arrestuar është L.V, 27 vjeç, i cili po punonte bashkë me viktimën në vilë. Ky i fundit ditën e djeshme u shpall në kërkim nga policia si autor i dyshuar për vrasjen e të riut.
Por sipas disa burimeve të policisë, kanë qenë dy vëllezërit ata që e kanë kërcënuar 27-vjeçarin për të marrë përsipër krimin të cilin nuk e kishte kryer ai.
Shtetasi L.V është arrestuar gjatë mbrëmjes nga policia, pasi Gjykata e Rrethit Gjyqësor Tiranë ka caktuar masën e sigurisë “Arrest në burg “, për veprat penale “Kundërshtim me dhunë i punonjësit të policisë së rendit publik”, “Prodhimi dhe mbajtja pa leje e armëve lufatarke dhe municionit” dhe “Shkatërrimi i pronës”.
Kujtojmë se i riu nga Mallakastra, ndërroi jetë mëngjesin e sotëm, pasi që nga dita e djeshme ishte në koma për shkak të plumbit që e zuri në kokë.
