Babai i 25-vjeçarit Klodian Rasha i cili mbeti i vrarë nga efektivi i “Shqiponjave”, orët e para të mëngjesit të 8 dhjetorit, Qazim Rasha, ka treguar një pjesë të takimit me kryeministrin Rama.
Kujtojmë se kryeministri Rama porsa ka mbërritur në Shqipëri nga një vizitë disa ditore në SHBA, ka shkuar menjëherë për vizitë ngushëlluese te familja e 25-vjeçarit i cili mbeti i vrarë nga polici.
Gjatë një rrëfimi për emisionin “Alibi” në Klan Kosova, Qazim Rasha ka rrëfyer se gjatë takimit me kryeministrin Rama i ka thënë këtij të fundit që nuk e pranon pensionin e bërë me vendim të veçantë për djalin e tij, por ka kërkuar vetëm që e vërteta të zbardhet.
Ndërkaq, Qazim Rasha ia ka bërë të qartë se nëse do i lidheshin edhe 700 pensione do i dërgonte për fëmijët në nevojë.
“Kryeministrit i thashë: Kryeministër, unë jam kryetar i familjes, ti je kryetar i shtetit. Je ai që do i mbrosh si fëmijët e mi, njësoj si të tutë. Nëse ke ardhur për ngushëllim je i mirëpritur si çdo qytetar. Nuk kërkoj asnjë lloj lëmoshe, apo mëshire, se i kam rritë fëmijët me djersën e ballit. Shtetit nuk i kërkoj ndihmë, por dinjitetin e familjes sime.
Nëse e mendoni si unë ju faleminderit. Unë nuk kam nevojë për para, por kam nevojë që çështja të zbardhet dhe të shërohet një pjesë e plagës.
Nëse ju e ndjeni se jeni pjesë e fajit, ti vendos 700 pensione, unë sot e deklaroj jepja njerëzve të varfër, fëmijëve të sëmurë, të gëzojnë ata prindërit shëndetin e fëmijës së tyre”, ka thënë Qazim Rasha./Gazetareforma.com/
