Në vijim të hetimeve për vrasjen e 23-vjeçarit Renis Dobra në Mat, burime nga grupi hetimor bëjnë me dije se një nga personat e shoqëruar gjatë operacionit për arrestimin e Fatjon Bushgjokës në Tiranë ka qenë edhe e dashura e tij.
Vajza është marrë në pyetje nga policia, jo si e dyshuar, por si person që mund të ketë dijeni për lëvizjet dhe veprimet e të dyshuarit përpara dhe pas ngjarjes së rëndë të ndodhur mbrëmjen e 8 korrikut.
Fatjon Bushgjoka është një prej autorëve të dyshuar të përfshirë në krim, ndërsa dy vëllezërit e tij, Aleksandër dhe Kristi Bushgjokaj, vijojnë të jenë në kërkim nga policia.
Të tre vëllezërit rezultojnë me precedentë penalë për vepra që përfshijnë vjedhje dhe trafik droge.
Një tjetër person i përfshirë në këtë rast është Petrit Çakrri, i njohur gjithashtu me mbiemrin Hoxha, i cili u kap nga policia dhe iu gjetën doza kokainë gjatë kontrollit.
Çakrri rezulton të ketë qenë bashkëpunëtor në ngjarje dhe ka ndihmuar në organizimin e rrëmbimit dhe vrasjes së Renis Dobrës, përmes përdorimit të automjeteve të marra me qira.
Sipas hetimeve paraprake, Dobra kishte pasur marrëdhënie pune me grupin Bushgjokaj në Gjermani, ku kishte shpërndarë kokainë për llogari të tyre.
Në disa raste, ai kishte mashtruar vëllezërit duke pretenduar se droga ishte sekuestruar ose kishte humbur gjatë një ndjekjeje nga policia. Këto mashtrime kanë gjeneruar tension të madh dhe dyshohet se janë bërë shkak për vendimin ekstrem të grupit për ta eliminuar fizikisht.
Grupi hetimor vijon me shoqërime dhe marrje në pyetje të personave të tjerë që mund të kenë dijeni për krimin, për të ndërtuar të plotë dinamikën e ngjarjes dhe përgjegjësinë e secilit nga të përfshirët.
23-vjeçari u raportua i zhdukur mbrëmjen e 8 korrikut, ndërsa trupi i pajetë i tij u gjet pranë liqenit të Shkopetit, në fshatin Madhesh, mëngjesin e ditës tjetër. I riu është dhunuar, mbytur me litar dhe më pas trupi i pajetë është hedhur së bashku me makinën me të cilën lëvizte drejt liqenit të Shkopetit.
Trupi u gjet në një zonë me shkurre, rreth 10 metra nga bregu i liqenit, ndërsa automjeti më vonë nga policia në ujë.
