Zbardhen detaje të reja nga hetimet për vrasjen e Renis Dobrës, 23-vjeçarit nga fshati Zenisht i Matit, ngjarje që po hetohet si një ekzekutim i mirëorganizuar me motive të lidhura me të kaluarën e tij kriminale në Gjermani.
Sipas burimeve hetimore dhe raportimit të gazetarit Enver Doçi nga “News24”, dy automjete tip Range Rover dyshohet se kanë mbërritur nga Rrësheni për të marrë peng të riun.
Paralelisht, një tjetër makinë e ardhur nga Miloti ka kryer një kontroll përgjatë 12 kilometrave në aksin Milot–Burrel, pa hyrë në rrugë dytësore, për të siguruar terrenin dhe për të shmangur çdo ndërhyrje të mundshme.
Hetimet po përqendrohen mbi dyshimet se vrasja e Dobrës lidhet me aktivitetin e tij kriminal në Gjermani, ku ai ka qenë i dënuar me disa vite burg për shpërndarje të lëndëve narkotike.
Sipas hetuesve, konflikte të pazgjidhura në rrjetin e trafikut të drogës mund të kenë qenë motivi kryesor i ekzekutimit.
Ekspertiza mjeko-ligjore ka konfirmuar paraprakisht se Dobra është mbytur me litar. Shenjat e dukshme në zonën e fytit tregojnë për një tërheqje të fortë, të një litari ose teli.
Ndërkohë, autoritetet kanë identifikuar të paktën 10 persona që pritet të shoqërohen në lidhje me këtë ngjarje, teksa hetimet po zgjerojnë pistat për të zbardhur plotësisht rrjetin dhe motivet që çuan në vrasjen e 23-vjeçarit.
