Gjashtë ditë pas vrasjes tragjike të 14-vjeçarit Martin Cani, shumë prindër u mblodhën paraditen e sotme para shkollës “Fan Noli” për të kërkuar veprime nga autoritetet.
Migen Qiraxhi, përfaqësuese e Qëndresës Qytetare, lexoi disa kërkesa drejtuar qeverisë, duke përfshirë kërkesën për dorëheqjen e ministres së Arsimit.
Ajo paralajmëroi gjithashtu një protestë që do të mbahet të hënën në orën 17:00. “I detyrohemi Martinit, i detyrohemi fëmijëve tanë,” tha Qiraxhi, duke theksuar nevojën për ndryshime të menjëhershme.
“Të dashur qytetarë ne prindërit të cilët kemi fëmijët në shkollat e tiranës zhvilluam marshimin protestë pas vrasjes së 14-vjeçarit Marti nCani. Ne artikuluam disa kërkesa për institucionet përgjegjëse. Kërkuam dorëheqjen e ministres së Arsimit, do krijonte precedentin dhe modelin e të mbajturit përgjegjësi. Do hapte një shteg drejt zgjidhjes së kësaj drame të madhe. Kësaj ministrie, kësaj shkolle i kishim besuar edukimin e më të shtrenjtëve tanë. Për Martinin dhe fëmijët tanë kjo ministre ka vetëm përqeshje dhe arrogancë.
Për këtë dhe pikat e tjera ne do të jemi ditën e hënë para Ministrisë së Arsimit në orën 17:00 për të thënë që nuk e tolerojmë këtë që ka ndodhur.
Kërkesat që ne kemi prekin disa nga problematikat kryesore me të cilat përballen shkollat sot.
Plotësimi i buxhetit, rritja e shkollave me psikologë, qëndrimi i nxënësve në hapësirat e shkollave deri në orën 16:00. Zbatimi emergjent për heqjen e telefonave gjatë mësimit. Çdo shkollë duhet të ketë oficerin e sigurisë. Krjimi i një sistemi me të gjitha hallkat për raportimin. Dorëheqje e menjëhershme e ministres së Arsimit. Nuk janë tekat tona, por domosdoshmëri. Ne si prindër dhe qytetarë të këtij vendi zotohemi të mos largohemi nga sheshi deri sa kërkesat të plotësohen. Do konsiderojmë dhe bojkotin e mësimit. Thirrje të gjithë qytetarëve t’i bashkohen protestat. Duhet të jemi për Martinin, për fëmijët, për vendin. i detyrohemi fëmijëve tanë”, deklaroi Qiraxhi.
