Hetimet për vrasjen e 30-vjeçarit Kristian Marku, i cili u ekzekutua pranë nënkalimit të Novoselës, kanë zbardhur detaje të reja.
Grupi hetimor ka kërkuar asistencën e INTERPOL-it për identifikimin dhe lokalizimin e autorëve të dyshuar, të cilët dyshohet se janë larguar drejt Kosovës pas krimit.
Sipas informacioneve të policisë, dyshohet se ekzekutimi i Kristian Markut është realizuar me dy automjete. Njëri automjet ka shërbyer për kryerjen e atentatit, ndërsa tjetri është përdorur për largimin e autorëve, pas djegies së automjetit të parë.
Nga dinamika e ngjarjes, ekzekutimi është kryer nga vrasës profesionistë, të cilët kanë planifikuar gjithçka me detaje, duke përfshirë edhe rrugën e arratisjes.
Kristian Marku dyshohet se ka qenë nën vëzhgim për disa ditë para atentatit. Ai kishte marrë një automjet me qira në Tiranë, çka tregon se lëvizjet e tij ishin monitoruar nga autorët.
Grupi hetimor po shqyrton disa pista, ku një prej tyre është ajo e hakmarrjes. Kristian Marku ishte nipi i Martin Bardhit, i vrarë në shtator të vitit 2023 në Rrëshen.
Marku kishte precedentë penalë, përfshirë një akuzë për “vrasje me dashje në bashkëpunim e mbetur në tentativë” dhe një tjetër për “mbajtje pa leje të armëve të zjarrit dhe municionit luftarak”.
Në vitin 2023, Marku u dyshua për përfshirje në një sulm me armë ndaj Saimir Reçit, nipit të Kastriot Reçit, i vrarë në janar 2020 me snajper në qendër të Rrëshenit. Megjithatë, akuza ndaj tij nuk u provua dhe ai u lirua. Pas atentatit në aksin Fier-Vlorë, autoritetet kryen kontrolle në banesën e familjes Reçi dhe shoqëruan disa anëtarë të fisit për t’i marrë në pyetje.
Konflikti mes fiseve Bardhi dhe Reçi ka një histori prej afro 28 vitesh.
