Bajram Begaj është zgjedhur presidenti i 8 i Republikës së Shqipërisë, me 78 vota pro, 4 kundër dhe 1 abstenim.
Theksojmë se kandidatura e tij u propozua dje nga socialistët dhe në më pak se 24 orë u konkludua dhe votimi i tij për postin e presidentit, detyrë të cilën do ta marrë pas datës 24 Korrik.
Pas procesit kryeministri Rama u shpreh se tashmë është arritur qartësisht objektivi që Partia Socialiste ka pasur që në fillim. Sipas Ramës, Bajram Begah është nëj president normal dhe figurë të pakontestueshme, në aspektin e integritetit, humanizmit dhe patjetër dhe të përkushtimit të vendit.
“Besoj se e kemi arritur qartësisht objektivin që e kemi pasur që në krye të herës, të gjitha reagimet flasin për këtë, përjashtuar në ndonjë reagim pa lidhje të hapësirës politike. I kemi dhënë Shqipërisë një president normal, një figurë të pakontestueshme, në aspektin e integritetit, humanizmit dhe patjetër dhe të përkushtimit të vendit dhe për njerëzit. Nuk ka asnjë rëndësi se cili ka qenë përfundimi aritmetik i këtij procesi, rëndësi ka që është kurorëzuar me një provë për të gjithë”, deklaroi Rama.
Në procesin e votimit morën pjesë 83 deputetë, nga të cilët 74 ishin nga mazhoranca. Nga opozita votuan Mesila Doda, Shpetim Idrizi, Nusret Avdullai, Monika Kryemadhi, Petrit Vasili, Erisa Xhixho ndërsa në votime morën pjesë edhe tre deputetë të PSD.
Votat kundër mendohet se kanë ardhur 3 nga LSI dhe 1 nga PDIU. Aludohet se 1 votë abstenim të ketë ardhur nga deputetët e PDIU, e po kështu një prej deputetëve të kësaj partie të ketë votuar pro për presidentin Begaj.
