Problemet me nisjen e zarfeve
Në faqen zyrtare të Komisionit Qendror të Zgjedhjeve thuhet se të gjitha zarfet për votimin e diasporës janë nisur. Por realiteti në kompleksin Dinamo tregon të kundërtën. Përpunimi i zarfeve vijon ende, dhe sipas informacioneve, duhen edhe katër ditë të tjera për të dërguar zarfin e fundit.
Vendimi i Kryekomisionerit Ilirjan Celibashi për të nisur shpërndarjen me shtetet që kanë më pak votues, si Australia dhe të lërë për në fund Greqinë, ku ndodhen shumica e votuesve, ngre dyshime serioze për qëllimin dhe transparencën e procesit.
Ritmi i ngadaltë dhe parashikimet e gabuara
Celibashi kishte premtuar që nisja e zarfeve do të përfundonte një javë më parë. Duket se jemi ende shumë larg nga ky parashikim. A do të arrijnë të gjitha zarfet në destinacion deri më 11 maj, kur mbyllet “porta” e pranimit të votave të diasporës?
Mospërputhja e kritereve dhe mungesa e transparencës
Celibashi ka vendosur që “porta” për dorëzimin e votave të mbyllet njëkohësisht me përfundimin e votimit brenda Shqipërisë. Pse jo me përfundimin e numërimit, duke garantuar një kohë të mjaftueshme për kthimin e votave?
Gjithashtu, pse shpërndarja nuk nisi nga shtetet me më shumë aplikues, siç ishte logjike dhe siç e shfaq renditja në faqen e vetë KQZ-së? Këto vendime kanë krijuar një proces që i penalizon rëndë votuesit më të shumtë.
Shpenzime të larta dhe keqmenaxhim
Ndërkohë që mbi 13 milionë euro janë shpenzuar nga buxheti i shtetit për këtë proces, KQZ organizon vizita të stafit nëpër magazina me autobusa me qira, në vend që të fokusohet në përshpejtimin e dërgesave.
Kujtojmë që një votë emigranti i kushton shtetit shqiptar plot 52 euro — një kosto e lartë që kërkon rezultate konkrete dhe menaxhim rigoroz.
Pritja e dëmshme për votuesit
Celibashi ka këmbëngulur që emigrantët të presin tre tentativa të postierit për dorëzimin e zarfit me votën, duke i detyruar ata të qëndrojnë në shtëpi ose të humbasin ditë të tëra. Në fakt, emigrantët mund ta tërheqin menjëherë zarfin në postë sapo marrin njoftimin e mbërritjes me email.
Ky orientim i gabuar çon në vonesa të panevojshme dhe rrezikon që shumë vota të mos kthehen në kohë.
Mungesa e opsioneve dhe vonesat e panevojshme
Celibashi nuk ka sqaruar pse emigrantëve nuk u është ofruar mundësia të dorëzojnë personalisht zarfin e votës së plotësuar në postë, duke preferuar vetëm opsionin e kthimit nëpërmjet postierit, çka shkakton humbje të mëtejshme kohe.
Me këtë stil, emigrantët mund të humbasin 6-7 ditë për të realizuar një proces që, siç treguan disa raste të raportuara publikisht, mund të përmbyllet brenda pak orësh.
Rreziku i dështimit të procesit
Nëse vazhdohet me këtë ritëm të ngadaltë, një përqindje e konsiderueshme zarfeve mund të mos mbërrijë në kohë për t’u numëruar. Kjo do të përbënte një dëm të madh ndaj votës së diasporës dhe një shpërdorim të rëndë të fondeve publike.
A do të mbajë Ilirjan Celibashi përgjegjësi për votat që mund të humbasin për shkak të keqmenaxhimit dhe vendimeve të pajustifikuara?
