Më shumë se 60 milionë amerikanë janë prekur nga një stuhi dimërore e përmasave të mëdha, e cila pritet të sjellë reshjet më të mëdha të borës dhe temperaturat më të ulëta të dekadës së fundit.
Deri tani, shtatë shtete kanë shpallur gjendjen e jashtëzakonshme, përfshirë Kansasin, një nga zonat më të goditura, si dhe Misurin, Kentakin, Virxhinian, Virxhinian Perëndimore, Arkansasin dhe pjesë të Nju Xhersit.
Sipas parashikuesve të motit, kjo situatë ekstreme është pasojë e një vorbulle polare, një masë e fuqishme ajri të ftohtë që rrotullohet rreth Arktikut dhe ka sjellë mot të acartë në pjesën qendrore të SHBA-së.
Si pasojë e stuhisë, mijëra fluturime janë anuluar ose vonuar, shumë rrugë janë bllokuar dhe shkollat janë mbyllur, duke shkaktuar një kaos të madh në të gjithë rajonet e prekura.
